Author: LANKA24X7

2026 වසරට අදාළ ඡන්ද හිමි නාම ලේඛනය ලියාපදිංචි කිරීම සම්බන්ධයෙන් මැතිවරණ කොමිසම විසින් දැනුම්දීමක් සිදු කර තිබේ. ඒ අනුව මේ වසරට අදාළ ලේඛනයට ඇතුළත්වී නොමැති හෝ ලිපිනයෙහි, නමෙහි, හැඳුනුම්පතෙහි සංශෝධන ඇති, 2009.02.01ට පෙර උපන් අය තම ග්‍රාම නිලධාරී කාර්යාලයෙන් ඒ බව විමසීමක් සිදු කළ යුතුය. ඉදිරි ලියාපදිංචි කිරීමේ ක්‍රියාවලියට පෙර තම තොරතුරු නිවැරදිව සටහන් කර ඇති බව සහතික කර ගන්නා ලෙසට කොමිසම ජනතාවගෙන් ඉල්ලා සිටියි. ඒ අනුව මැතිවරණ කොමිසමේ නිල වෙබ් අඩවිය වෙත පිවිස සිය තොරතුරු නිවැරදිදැයි පරීක්ෂා කළ හැකිය

කොටවෙහෙර, පලුගොල්ල ප්‍රදේශයේ දී කාන්තාවක් විදුලි සැර වැදීමෙන් මියගොස් තිබේ. මෙලෙස මියගොස් ඇත්තේ වයස අවුරුදු 69ක් වූ පලුගොල්ල, ගල්ගමුව ප්‍රදේශයේ පදිංචිකාරියකි. ජල මෝටරයක් සඳහා විදුලිය ලබා දී තිබූ වයරයේ ඇති වූ විදුලි කාන්දුවීමක් මගින් අදාළ කාන්තාවට විදුලි සැර වැදී ඇති බව මූලික විමර්ශනවල දී අනාවරණය වී ඇත. කොටවෙහෙර පොලීසිය විසින් සිද්ධිය සම්බන්ධයෙන් වැඩිදුර විමර්ශන සිදු කරයි.

සිය සාධාරණ ඉල්ලීම්වලට කඩිනම් විසඳුමක් නොලැබෙන්නේ නම් ඉදිරියේදී කොළඹට පැමිණ දැවැන්ත විරෝධතාවල නිරත වන බව ගොවීහු ආණ්ඩුවට අනතුරු අඟවති. ගලෙන්බිඳුණුවැව, දුටුවැව පරණගම ගැමුණු එක්සත් ගොවි සංවිධානය පෙන්වා දෙන්නේ, පොහොර හිඟය, අධික මිල සහ වී මිල පහත වැටීම හේතුවෙන් තමන් දැඩි දුෂ්කරතාවලට මුහුණදී සිටින බවය. කුඹුරු සඳහා අවශ්‍ය පොහොර වෙළෙඳපොළේ නොමැතිවීම සහ පවතින පොහොරවල මිල රුපියල් 9,000 සිට රුපියල් 18,500 දක්වා අධික ලෙස ඉහළ යාම තමන්ට කිසිසේත්ම දරාගත නොහැකි බව එම ගොවි සංවිධානයේ සභාපති කේ. හේමරත්න මහතා සඳහන් කරයි. මීට අමතරව, වත්මන් වෙළෙඳපොළ තුළ වී කිලෝවක් රුපියල් 100-105 වැනි ඉතා අඩු මුදලකට අලෙවි කිරීමට සිදුවීම හේතුවෙන් ගොවිතැන සඳහා වැය කළ පිරිවැය…

පේරාදෙණිය ප්‍රදේශයේදී ලොරි රථයක ගැටීමෙන් හිමිනමක් අපවත් වී ඇති බව පොලීසිය පවසයි. ඊයේ (16) දින පේරාදෙණිය පොලිස් වසමේ පේරාදෙණිය රජවත්ත මාර්ගයේදී මෙම අනතුර සිදුව ඇත. පෙරාදෙණිය සිට මහනුවර දෙසට ධාවනය වූ ලොරි රථයක් මාර්ගය හරහා ගමන් කළ හිමිනමකගේ ගැටී මෙම අනතුර සිදුව ඇත. අනතුරින් බරපතළ තුවාල ලැබූ හිමිනම පේරාදෙණිය රෝහල වෙත ඇතුළත් කිරීමෙන් පසු අපවත් වී තිබේ. අපවත් වී ඇත්තේ අවුරුදු 83ක් වූ බෝවලවත්ත ප්‍රදේශයේ ආරාමයක වැඩවාසය කළ හිමිනමකි. ලොරි රථයේ රියදුරු අත්අඩංගුවට ගෙන ඇති අතර අනතුර සම්බන්ධව පේරාදෙණිය පොලීසිය විසින් වැඩිදුර විමර්ශන සිදුකරති.

නීත්‍යානුකූල නොවන අන්දමින් මෙරටට ගෙන්වා ඇති යතුරුපැදි 02ක් සන්තකයේ තබාගෙන සිටි සැකකරුවෙකු මධ්‍යම අපරාධ විමර්ශන කාර්යංශය විසින් අත්අඩංගුවට ගෙන තිබේ. ඊයේ (16) අලුයම අතුරුගිරිය පොලිස් වසමේ මිලේනියම්සිටි නිවාස සංකීර්ණ ප්‍රදේශයේදී මධ්‍යම අපරාධ විමර්ශන අංශයේ නිලධාරීන් කණ්ඩායමක් විසින් සිදුකළ වැටලීමකින් සැකකරු අත්අඩංගුවට ගෙන ඇත. එහිදී බලපත්‍ර නොමැතිව විදෙස් රටවල සිට නීත්‍යානුකූල නොවන අන්දමින් මෙරටට ගෙන්වන ලද යතුරුපැදි 02 නිලධාරීන් භාරයටද ගෙන තිබේ. සිද්ධිය සම්බන්ධව අත්අඩංගුවට ගෙන ඇත්තේ අවුරුදු 29ක් වූ අතුරුගිරිය ප්‍රදේශයේ පදිංචිකරුවෙකි. මේ පිළිබඳව වැඩිදුර විමර්ශන මධ්‍යම අපරාධ විමර්ශන කාර්යාංශය විසින් සිදුකරති.

ශ්‍රී ලංකාවට උතුරු දෙසින් පිහිටා ඇති අඩු පීඩන කලාපය ක්‍රමයෙන් දුර්වල වෙමින් පවතීන බව කාලගුණ විද්‍යා දෙපාර්තමේන්තුව පවසයි. නිවේදනයක් නිකුත් කරමින් එම දෙපාර්තමේන්තුව පැවසුවේ මෙම පද්ධතියේ බලපෑම හේතුවෙන්, බස්නාහිර, සබරගමුව, මධ්‍යම, වයඹ සහ උතුරු පළාත්වලත් ගාල්ල සහ මාතර දිස්ත්‍රික්ක වලත් විටින් විට වැසි හෝ ගිගුරුම් සහිත වැසි ඇති වන අතර අහස වලාකුළින් බරව පවතින බවය. අනුරාධපුර දිස්ත්‍රික්කයේ වැසි වාර කිහිපයක් ඇතිවේ. ඌව සහ නැගෙනහිර පළාත්වලත් පොලොන්නරුව දිස්ත්‍රික්කයේත්   ස්ථාන ස්වල්පයක පස්වරු 1.00 න් පසුව වැසි හෝ ගිගුරුම් සහිත වැසි ඇති විය හැකි බවත් එහි සඳහන් වේ.

තායිලනතයේ බැංකොක් නුවරදී සිදුවූ දුම්රිය අනතුරකින් අවම වශයෙන් පුද්ගලයන් අට දෙනෙකු ජීවිතක්ෂයට පත්ව තවත් 25දෙනෙකු තුවාල ලබා ඇති බව විදෙස් මාධ්‍ය වාර්තා කර තිබේ. මෙම දුම්රිය අනතුර හේතුවෙන් ගිනි ගැනීමක් සිදුව ඇති අතර ඉන් බස් රථයක් සහ ඒ අසල තිබූ වාහන කිහිපයක් ගිනි ගැනීමට ලක්ව ඇත. කෙසේ වෙතත් අනතුරට හේතුව මෙතෙක් අනාවරණය වී නොමැත.

හෝමාගම පොලිස් වසමේ පිටිපන දකුණ ප්‍රදේශයේ වෙල්යායක් ආසන්නයේ පිහිටි ළිඳක් තුළ තිබී පුද්ගල මළසිරුරක් සොයාගෙන තිබේ. ඒ, ඊයේ (15) උදෑසන හෝමාගම පොලිස් ස්ථානයට ලද පැමිණිල්ලක් මත සිදුකළ විමර්ශනයකදීය. මරණකරු අවුරුදු  43ක් වූ මහාලන්ද, මොරොන්තුඩුව ප්‍රදේශයේ පදිංචි යුදහමුදා සෙබළෙකි. මහෙස්ත්‍රාත් පරීක්ෂණය හා පශ්චාත් මරණ පරීක්ෂණයෙන් පසු මෘතශරීරය ඥාතීන් වෙත භාරදී ඇති අතර හෝමාගම පොලිසිය විසින් සිද්ධිය පිළිබඳ වැඩිදුර විමර්ශන සිදු කරයි.

ආනයනය කරනු ලබන වාහන සඳහා අදාළ රේගු ආනයන බදු මත  50%ක අතිරේක බද්දක් අය කිරීමට මුදල් අමාත්‍යාංශය තීරණය කර තිබේ. ඒ අනුව ආනයනික මෝටර් රථයක් සඳහා මෙතෙක් අය කළ 30%ක රේගු ආනයන බද්ද මත තවත් 50%ක අතිරේක බද්දක් පැනවෙයි. ජනාධිපති අනුර කුමාර දිසානායක මහතාගේ අත්සනින් යුතුව නිකුත් කර ඇති විශේෂ ගැසට් නිවේදනය අනුව අද (16) සිට මාස තුනක කාලසීමාවක් සඳහා මෙම  සියයට 50ක අතිරේක බදු ගාස්තුවක් අය කිරීමට නියමිතය. කෙසේ වෙතත් මැයි 15 හෝ ඊට පෙර ණයවර ලිපි විවෘත කර ඇති වාහන සඳහා මෙම නව 50%ක රේගු බද්ද බලනොපාන බවද සඳහන් ය.

පවතින අයහපත් කාලගුණික තත්ත්වය හේතුවෙන් නිවාස 141ක් අර්ධ හානියට ලක්ව ඇතැයි ආපදා කළමනාකරණ මධ්‍යස්ථානය පවසයි. එම මධ්‍යස්ථානය පැවසුවේ පසුගිය 10 වැනි දින සිට අද (16) දින දක්වා වූ කාලය තුළ මෙම අර්ධ හානි නිවාස ප්‍රමාණය වාර්තා වී ඇති බවය. එමෙන්ම මෙම ආපදා තත්ත්වය හේතුවෙන් රත්නපුර දිස්ත්‍රික්කයේ එක් නිවාසයක් පූර්ණ හානියට ලක්ව ඇති බවද ආපදා කළමනාකරණ මධ්‍යස්ථානය සඳහන් කළේය. අර්ධ හානි වූ නිවාස අතරට වැඩිම නිවාස හානි ප්‍රමාණයක් වාර්තා වී ඇත්තේ කළුතර දිස්ත්‍රික්කයෙන් වන අතර එම නිවාස ගණන 78කි. මීට අමතරව මඩකලපුව දිස්ත්‍රික්කයේ නිවාස 25ක්, රත්නපුර දිස්ත්‍රික්කයේ නිවාස 12ක්, ගාල්ල දිස්ත්‍රික්කයේ නිවාස 6ක්, කොළඹ දිස්ත්‍රික්කයේ නිවාස 5ක්, මොනරාගල දිස්ත්‍රික්කයේ නිවාස 4,…