රටතුළ පවතින වියළි කාලගුණ තත්වයත් සමඟ පානීය ජල සපයා ගැනීමේ ගැටලු ඇති ප්‍රදේශවල ජනතාව වහාම 117ට ක්‍ෂණික දුරකථන අංකය ඔස්සේ දිස්ත්‍රික් ආපදා කළමනාකරණ මධ්‍යස්ථාන දැනුවත් කරන ලෙස ආපදා කළමනාකරණ මධ්‍යස්ථානයේ නියෝජ්‍ය අධ්‍යක්ෂ ප්‍රදීප් කොඩිප්පිලි මහතා පැවසීය.
එවැනි ප්‍රදේශවල ජනතාව අදාල ප්‍රදේශයේ ග්‍රාම නිලධාරීවරයා සම්බන්ධ කරගෙන එම දැනුම් දීම කළ යුතු බවත් එවැනි ප්‍රදේශවලට ජාතික ආපදා සහන සේවා මධ්‍යස්ථාන සහ ජල ප්‍රවාහන ඒකක එක්ව ජලය සැපයීමට කටයුතු කරන බවත් කොඩිප්පිලි මහතා කීය.
ජල සම්පාදන මණ්ඩලයේ ජලය සැපයුම කිසියම් ප්‍රදේශයකට නොලැබුණොත් එම මණ්ඩලයේ 1939 යන ක්‍ෂණික දුරකථන අංකයට දැනුම් දෙන ලෙස ජනතාවගෙන් ඉල්ලා සිටින බවත් ජලය අත්‍යවශ්‍ය කටයුතුවලට පමණක් පාවිච්චි කරන ලෙස ජනතාවගෙන් ඉල්ලා සිටින බවත් ජාතික ජල සම්පාදන හා ජලාපවහන මණ්ඩලයේ නියෝජ්‍ය සාමාන්‍යාධිකාරී අනෝජා කළුආරච්චි මහත්මිය පැවසුවාය.