ජනාධිපතිවරණයට වෙලාවට පොහොට්ටුවේ තුරුම්පු ආසියා ඉස්සරහට දාන බව නාගරික සංවර්ධන සහ නිවාස අමාත්‍ය ප්‍රසන්න රණතුංග මහතා පැවසීය.
ලබන වසර කොහොමත් මැතිවරණ වසරක් බව කී අමාත්‍යවරයා ඒ නිසා ජනාධිපතිවරණ අපේක්ෂකයන් වැහි වැහැලා සිටින නමුත් රටේ විශාලතම ඡන්ද පදනම තියෙන පොහොට්ටුව තවම නිශ්ෂබ්ද බව පැවසීය.
සජිත් ප්‍රේමදාස, අනුර කුමාර,සිවිල් සමාජ ක්‍රියාකාරිකයන් , ව්‍යාපාරිකයන් ජනාධිපතිවරණ අපේක්ෂක පෝලිමේ එන බව කී රණතුංග මහතා ජනාධිපතිවරණ, මහා මැතිවරණ, පළාත් සභා, පළාත් පාලන මැතිවරණ මොනවා තිබ්බත් ජනතා මනාපයෙන් ඉහලින්ම දිනන්නේ පොහොට්ටුව බව සඳහන් කළේය.
ගම්පහ,උඩුගම්පළ පිහිටි කාර්යාලයේදී දේශපාලන ක්‍රියාකාරීන් පිරිසක් අමතමින් අමාත්‍යවරයා මේ බව සඳහන් කළේය.
ඊනියා අරගලකරුවන් හා කුමන්ත්‍රණකරුවන් එකතුවී විනාශයට ගෙන ගිය රට යථා තත්ත්වයට ගනිමින් ජනාධිපති රනිල් වික්‍රමසිංහ මහතා රටේ අනාගතය තහවුරු කරමින් තිබෙන බව කී ප්‍රසන්න රණතුංග මහතා දවස් දහයක් ඇතුලත ලෝකයේ ප්‍රබල රටවල් හතරක නායකයන් හා ප්‍රධානීන් මුණගැසීමෙන් ජනාධිපතිවරයා ජාත්‍යන්තරයේ විශ්වාසය ඉහලින්ම දිනාගෙන ඇති බව තහවුරු වන්නේ යැයි කීය.