බන්ධනාගාරගත රැඳවියන්ගේ සුභ සාධන කටයුතු තවදුරටත් විධිමත් කිරීම සහ බන්ධනාගාර තුළ හදිසි තත්වයක් ඇති වුවහොත් රාජ්‍ය ආයතන අතර සම්බන්ධිකරණයක් ඇති කිරීම සදහා ඒකාබද්ධ යාන්ත්‍රණයක් පිහිටුවීමේ වැඩපිළිවෙළ යටතේ කෑගල්ල රිමාන්ඩ් බන්ධනාගාරය තුළ එම යාන්ත්‍රණය ස්ථාපිත කිරීම සම්බන්ධයෙන් සාකච්ඡාවක් අධිකරණ සහ ජාතික ඒකාබද්ධතා අමාත්‍ය, නීතිඥ හර්ෂණ නානායක්කාර මහතාගේ ප්‍රධානත්වයෙන් ඊයේ ( 01) පස්වරුවේ සිදු විය.
බන්ධනාගාරය තුළ හදිසි තත්වයක් ඇති වුවහොත් ඊට මුහුණදීම සහ බන්ධනාගාර ගැටුම් ඇතිවීමට ප්‍රධාන හේතුවක් වන රැඳවියන්ගේ සුභ සාධන පහසුකම් තවදුරටත් විධිමත් කිරීම, රාජ්‍ය ආයනවල මැදිහත්වීමෙන් රැඳවියන්ගේ පවුල්වල අවශ්‍යතා ලබාදීම සම්බන්ධයෙන් අධිකරණ අමාත්‍යතුමා විසින් නිලධාරීන් දැනුවත් කළ අතර, කෑගල්ල රිමාන්ඩ් බන්ධනාගාරයේ ඉඩකඩ පහසුකම් වැඩිදියුණු කිරීම පිළිබඳවද සාකච්ඡාවේදී අවධානය යොමු විය.
මේ අතර කෑගල්ල රිමාන්ඩ් බන්ධනාගාරයේ කටයුතු නිරීක්ෂණය කිරීමටද අධිකරණ අමාත්‍යවරයා සහභාගි විය.
විශේෂයෙන් රස පරීක්ෂක වාර්තා කඩිනම් කිරීමට රජය විසින් ගෙන ඇති වැඩපිළිවෙළ සම්බන්ධයෙන් අමාත්‍යවරයා විසින් මෙහිදී රැඳවියන් දැනුවත් කරන ලදී.
කෑගල්ල දිස්ත්‍රික් ලේකම් කේ.ජී.එස්.නිශාන්ත, කෑගල්ල ප්‍රාදේශිය ලේකම් ප්‍රියංගනී පෙත්තන්ගොඩ, කෑගල්ල ප්‍රදේශය භාර නියෝජ්‍ය පොලිස්පති දිනේෂ් කරුණානායක, මේජර් ජනරාල් ආර්.පී.එස්.පී. රන්දුනු, කෑගල්ල සහකාර බන්ධනාගාර වජිර එදිරිසිංහ යන මහත්ම මහත්මීන් සහ විදුලි බල මණ්ඩලය, ගිනි නිවීම් ඒකකය, ජාතික ජල සම්පාදන හා ජලා ප්‍රවාහන මණ්ඩලය ඇතුළු රාජ්‍ය ආයතන නියෝජනය කරමින් නිලධාරීන් මෙම අවස්ථාවට එක්ව සිටියහ.