කිරින්ද ධීවර වරායේ වැලි කැණීමේ ව්‍යාපෘතියක් කොරියානු සමාගමකට ලබාදී රජයට රුපියල් කෝටි දෙකකට අධික පාඩුවක් කළැයි කියන සිද්ධියට අදාළව මාස තුනක පමණ කාලයක් තිස්සේ සැඟව සිටින හිටපු අමාත්‍ය රාජිත සේනාරත්න මහතා අද (29) කොළඹ මහෙස්ත්‍රාත් අධිකරණයේ පෙනී සිටීමට සුදානම් බව ඔහුගේ නීතීඥවරයා කොළඹ මහාධිකරණ විනිසුරු ඉන්ද්‍රිකා කාලිංග වංශ මහත්මියට ඊයේ (28) දැනුම් දුන්නේය.
වහාම අත්අඩංගුවට ගන්නා ලෙස නියම කරමින් මහේස්ත්‍රාත් අධිකරණයෙන් නිකුත් කර ඇති වරෙන්තුව අත්හිටුවන්නැයි ඉල්ලමින් රාජිත සේනාරත්න මහතා ඉදිරිපත් කළ ප්‍රතිශෝධන පෙත්සම කැඳවූ අවස්ථාවේදී ඒ බව දැනුම් දෙමින් ඔහු වෙනුවෙන් පෙනී සිටි ජනාධිපති නීතීඥ කාලිංග ඉන්දතිස්ස මහතා කළ ඉල්ලීමකට අනුව විනිසුරුවරිය අල්ලස් කොමිසමේ අධ්යක්ෂ ජනරාල්වරයාට අධිකරණයේ පෙනී සිටින ලෙස නියම කරමින් නොතිසිද නිකුත් කළාය.
හිටපු අමාත්‍ය රාජිත සේනාරත්න මහතා ඉදිරිපත් කළ ප්‍රතිශෝධන පෙත්සමේ වගඋත්තරකරුවන් වශයෙන් අල්ලස් කොමිසමේ අධ්යක්ෂ ජනරාල්වරයා ඇතුළු පිරිසක් නම් කර ඇත.
කිරින්ඳ ධීවර වරායේ වැලි කැණීම්කර, එම වැලි දේශීය වෙළඳපොළට නිකුත් කළ හැකි පරිදි ව්‍යාපෘතියක් පවත්වාගෙන ගෙන යෑමට කොරියානු සමාගමකට 2012 මැයි 10 වැනිදා අවසර දීම හේතූවෙන් රජයට රුපියල් කෝටි 2 1/2කට අධික පාඩුවක් කරන ලදැයි කියන සිද්ධියට අදාළව ප්‍රකාශයක් සටහන් කර ගැනීම සඳහා අවස්ථා ගණනාවකදී අල්ලස් කොමිසම හමුවේ පෙනී සිටින ලෙස නියම කරමින් හිටපු අමාත්‍ය රාජිත සේනාරත්න මහතාට දැනුම්දීම් කර තිබුණත් ඔහු අල්ලස් කොමිසම හමුවේ පෙනී නොසිටී බව අල්ලස් කොමිසම මීට පෙර අවස්ථාවක අධිකරණයට දැනුම් දී තිබිණී.
සිද්ධිය සම්බන්ධයෙන් ප්‍රකාශයක් දෙන ලෙස හිටපු අමාත්‍ය රාජිත සේනාරත්න මහතාට කළ දැනුම්දීම් නොසළකා හැරීම හේතූවෙන් ඔහු අත්අඩංගුවට ගැනීමට ඔහු පදිංචි බවට තොරතුරු ලැබුණු ස්ථාන පහකට ගියත් එම ස්ථාන වල නොමැතිව ඔහු සැඟව සිටින බවත් මාස 02ක පමණ කාලයක් තිස්සේ ඔහුගේ ජංගම දුරකථනය ද විසන්ධිකර ඇති බවටත් දැනුම් දෙමින් අල්ලස් කොමිසම මීට පෙර අවස්ථාවක මෝෂමක් මඟින් කළ ඉල්ලීමක් පිළිගනිමින් මහේස්ත්‍රාත්වරයා වහාම ඔහු අත්අඩංගුවට ගන්නා ලෙස නියම කරමින් වරෙන්තු නිකුත් කර තිබිණී.
ඒ අතරතුර වරෙන්තු ලබා සැඟව සිටින රාජිත සේනාරත්න මහතා අත්අඩංගුවට ගැනීමට මාස දෙකකට අධික කාලයක් තිස්සේ උත්සාහ දැරුවත් ඔහු දිගින් දිගටම සැඟව සිටින හෙයින් ඔහු අත්අඩංගුවට ගැනීමට නොහැකි වී ඇතැයි කියමින් අල්ලස් කොමිසම පසුගිය 20 වැනිදා කළ ඉල්ලීමක් පිළිගනිමින් කොළඹ ප්‍රධාන මහේස්ත්‍රාතවරිය හෙට (29) දින අධිකරණයේ පෙනී සිටන ලෙස නියම කරමින් රාජිත සේනාරත්න මහතාට නියෝගයක් නිකුත් කළ අතර එම නියෝගය කොළඹ ප්‍රධාන මහේස්ත්‍රාත් අධිකරණ පරිශ්‍රයේ හා රාජිත සේනාරත්න මහතා පදිංචි ස්ථානවල අලවා ප්‍රදර්ශනය කිරීමටද ශබ්ද විකාශන යන්ත්‍ර මඟින් ප්‍රචාරයක් කිරීමටද නියම කෙරුණු අතර අල්ලස් කොමිසමේ නිලධාරීහු ඒ අනුව කටයුතු කරන අයුරූ පසුගිය දිනවල මාධ්‍ය මඟින් ප්‍රචාරය කෙරිණී.
එසේ තිබියදී තමන් වහාම අත්අඩංගුවට ගන්නා ලෙස නියම කරමින් මහේස්ත්‍රාත් අධිකරණයෙන් නිකුත් කර ඇති වරෙන්තුව අත්හිටුවන නියෝගයක් නිකුත් කරන්නැයි ඉල්ලමින් රාජිත සේනාරත්න මහතා ඉදිරිපත් කළ ප්‍රතිශෝධන පෙත්සම මහාධිකරණ විනිසුරු ඉන්ද්‍රිකා කාලිංගවංශ මහත්මිය හමුවේ කැඳවූ අවස්ථාවේදී ඔහු වෙනුවෙන් පෙනී සිටි ජනාධිපති නීතීඥ කාලිංග ඉන්දතිස්ස මහතා කරුණු දක්වමින් තම සේවාදායකයාව එරෙහිව 2013 වසරේදී ලැබුණු නිර්නාමික පැමිණිල්ලකට අනුව අල්ලස් කොමිසම විමර්ශනයක් ආරම්භ කළ බවත් එම විමර්ශනයට අදාළව ප්‍රකාශයක් දීමට ජූලි 02 වැනිදා අල්ලස් කොමිසම හමුවේ පෙනී සිටින ලෙස දැනුම් දෙමින් ලිපියක් එවා තිබුණත් උණ රෝගී තත්වයකින් පෙ`ථණු තම සේවාදායකයාට එදින උසාවියේ පෙනී සිටිමට නොහැකි වූවත් වෛද්‍ය වාර්තාද සමඟින් ඒ බව අල්ලස් කොමිසමට දැනුම් දීමට කටයුතු කළ බවත් පැවසීය.
නීතියෙන් ලැබී ඇති අයිතිවාසිකම් අනුව තම සේවාදායකයා කොළඹ මහේස්ත්‍රාත් අධිකරණයට ඉදිරිපත් කළ අපේක්ෂිත ඇප ඇයැදුම අධිකරණය විසින් ප්‍රතික්ෂේප කළ බවත් මහේස්ත්‍රාත් අධිකරණයේ තීරණයට එරෙහිව තම සේවා දායකයා කොළඹ මහාධිකරණයට ඉදිරිපත් කළ ප්‍රතිශෝධන පෙත්සම විභාගයට ගැනීම සඳහා නොතිසී නිකුත් කර තිබියදී අල්ලස් කොමිසම පසුගිය 12 වැනිදා තම සේවාදායකයා අත්අඩංගුවට ගැනීමට කොළඹ මහේස්ත්‍රාත් අධිකරණය මඟින් වරෙන්තු නිකුත් කරවාගෙන ඇතැයිද කී ජනාධිපති නීතිඥවරයා නීතීයට පටහැනි ආකාරයට මහෙස්ත්‍රාත්වරයා අදාළ වරෙන්තුව නිකුත් කර ඇතැයිද කීය.
වරෙන්තුවක් නිකුත් කිරීමට පෙර සාක්ෂි මෙහෙයවීම අත්‍යවශ්‍ය බව අපරාධ නඩු විධාන සංග්‍රහයේ සඳහන්ව තිබුණත් එවැනි සාක්කි විමසීමකින් තොරව මහේස්ත්‍රාත්වරයා වරෙන්තුව නිකුත් කර ඇති හෙයින් ලසුගිය 12 වැනිදා තම සේවාදායකා අත්අඩංගුවට ගන්නා ලෙෂ නියම කරමින් මහේස්ත්‍රාත්වරයා නිකුත් කළ වරෙන්තුව නීතියට සම්පූර්ණයෙන්ම පටහැනි යැයි කී ජනාධිපති නීතිඥවරයා මහේස්ත්‍රාත්වරයා තම සේවාදායකයාට එරෙහිව වරෙන්තු නිකුත් කරමින් නිකුත් කළ නියෝගය ප්‍රතිශෝධනය කරන්නැයි ඉල්ලා සිටියේය”
තම සේවාදායකයාට අද (29) දිනයේ මහෙස්ත්‍රාත් අධිකරණයේ පෙනී සිටින ලෙස නියම කරමින් මහේස්ත්‍රාත්වරයා විසින් නිකුත් කර ඇති නොතිසියට අනුව ඔහු හෙට දිනයේ කොළඹ මහේස්ත්‍රාත් අධිකරණයේ අනිවාර්යයෙන්ම පෙනී සිටින බවත් කී ජනාධිපති නීතිඥවරයා තම සේවාදායකයා අත්අඩංගුවට ගැනීම සඳහා නිකුත් කර ඇති වරෙන්තුව තාවකාලිකව අත්හිටුවීමේ අතුරු තහනම් නියෝගයක් නිකුත් කරන්නැයි ඉල්ලා සිටියේය.
කරුණු සලකා බැලීමෙන් අනතුරුව පෙත්සම සැප්තැම්බර් 10 වැනිදා යළි කැඳවීමට නියම කළ විනිසුරුවරිය එදින අධිකරණයේ පෙනී සිටින ලෙස නියම කරමින් වගඋත්තරකාර අල්ලස් කොමිසමේ අධ්යක්ෂ ජනරාල්වරයාට නොතිසි නිකුත් කළාය.