හැටන් කලාප අධ්‍යාපන කාර්යාලයේ පාසලක විදුහල්පතිවරයා සහ ඔහුගේ බිරිද ස්ථාන මාරු කරදෙන ලෙස ඉල්ලා එම පාසලේ අධ්‍යාපනය ලබන සිසු සිසුවියන්ගේ මව්පියන් පිරිසක් හැටන් කලාප අධ්‍යාපන අධ්‍යක්ෂකවරයාට ලිඛිතව පැමිණිලි කර ඇත.
වසර 30 ක කාලයක් විදුහල්පතිවරයා සහ ඔහුගේ බිරිද එම පාසලේ සේවය කරන බවත්, ඔවුන් දෙදෙනාගේ ක්‍රියාකලාපය හේතුවෙන් එම පාසලට පැමිණෙන ගුරුවරුන් ස්ථාන මාරුවිම් ලබාගෙන යන බව එම ලිපියෙන් කියයි.
විදුහල්පතිවරයාට සහ ඔහුගේ බිරිදට අවනත නොවන ගුරුවරුන්ට ස්ථාන මාරුවිම් ලබාගෙන යන ලෙසට විදුහල්පතිවරයා විසින් බල කරන බව මව්පියන් කලාප අධ්‍යාපන අධ්‍යක්ෂකවරයාට කරන ලද පැමිණිල්ලේ සඳහන්ව ඇතැයි කියැවෙයි.
විදුහල්පතිවරයා සහ ඔහුගේ බිරිදට ස්ථාන මාරුවිම් ලබාදිමට කඩිනමින් පියවර නොගතහොත් එම පාසලේ අධ්‍යාපනය ලබන තම දරුවන් පාසලෙන් ඉවත්කරගෙන වෙනත් පාසල්වලට ඇතුලත් කිරිමට පියවර ගන්නා බව මව්පියන් විසින් එම ලිපියේ වැඩිදුරටත් සදහන් කර ඇත.