මහ මූහුදේ පාවූ නොහඳුනන බෝතලයක දියර පානයක් කර ජීවිතක්ෂයට පත් වූ ධීවරයන් අතරින් දැනට ගොඩබිමට ගෙනවිත් හම්බන්තොට මහ රෝහලේ තැන්පත් කර ඇති ධීවර කාර්මිකයාගේ ශරීරයේ කොටස් රජයේ රස පරීක්ෂකවරයා වෙත යවා වාර්තාවක් අධිකරණය හමුවට ඉදිරිපත් කරන ලෙසටත් එතෙක් මරණය සම්බන්ධයෙන් විවෘත තීන්දුවක් ලබාදීම සිදුකරන බවත් පශ්චාත් මරණ පරීක්ෂණය පැවැත් වූ හම්බන්තොට මහ රෝහලේ අධිකරණ විශේෂඥ වෛද්‍ය දිල්හානී අමරසිංහ මහත්මිය හම්බන්තොට වරාය පොලිසියට නියෝග කළාය.
තංගල්ල ධීවර වරායෙන් ඉකුත් 04 වැනිදා ධීවර කර්මාන්තය සඳහා පිටත්ව ගිය ඩෙවෝන් 5 බහුදින ධීවර වරායේ සිටි ධිවරයන් පස් දෙනකු කිසියම් පාන වර්ගයක් පානය කිරීමෙන් ජීවිතක්ෂයට පත් වී අසාධ්‍ය තත්ත්වයෙන් එක් ධීවර කාර්මිකයෙක් හම්බන්තොට මහ රෝහලට ඇතුළත් කරනු ලැබ සිටී.
අසාධ්‍ය තත්ත්වයෙන් පසුවූ ධීවර කාර්මිකයන් දෙදෙනා සිංගප්පූරු වෙළෙඳ නෞකාවකින් හම්බන්තොට ජාත්‍යන්තර වරාය කරා ගෙන එමින් සිටිය දී එක් ධීවර කාර්මිකයෙක් ජීවිතක්ෂයට පත්විය. එලෙස ජීවිතක්ෂයට පත් වූ තංගල්ල දංකැටිය පදිංචි ජී.එම් අජිත් කුමාර (56) යන අයගේ සිරුර සම්බන්ධයෙන් පශ්චාත් මරණ පරීක්ෂණය හම්බන්තොට මහ රෝහලේ දී පැවැත්විණි.
මියගිය අයගේ ශරීරයේ කොටස්. අමාශයේ ඇති දියර , රුධිරය , රජයේ රස පරීක්ෂක වරයා වෙත යවා වාර්තාවක් ලබා ගැනීමෙන් පසුව මරණය සම්බන්ධයෙන් තීරණයක් දෙන තෙක් විවෘත තීන්දුවක් දී මරණ කරුවන්ගේ ඥාතීන්ට සිරුර භාරදීම සිදු කෙරිණි.