ජාත්‍යන්තර ක්‍රිකට් පිටියේ පසමිතුරු සටන ලෙස හඳුන්වන ඉන්දු – පාකිස්තාන ක්‍රිකට් තරගයට වර්ෂාවෙන් බාධා එල්ල වීම හේතුවෙන් අත්හැර දැමීමට තීරණය කර තිබේ.
පල්ලෙකැලේ ක්‍රීඩාංගණයේදී කාසියේ වාසිය දිනූ ඉන්දියා නායකයා ප්‍රථමයෙන් පන්දුවට පහරදීමට තීරණය කළේය.
ඒ අනුව, පිටියට පිවිසි ඉන්දීය පිතිකරුවන්ට ඉනිමේ මුල් භාගයේදී දැඩි පීඩනයක් එල්ල කිරීමට පාකිස්තාන වේගපන්දු යවන්නන් සමත්වුණි.
එම පීඩනයේ ප්‍රතිඵලයක් ලෙස ඉන්දීය මුල් පෙල පිතිකරුවන් වූ රෝහිත් ෂර්මා, ශුබ්මන් ගිල්, විරාත් කෝලි සහ ශ්‍රෙයාස් අයියර්ට ක්‍රීඩාගාරය වෙත නැවත හැරීයාමට සිදුවූයේ ලකුණු පුවරුව 66ක් ලෙස සටහන් වෙද්දී ය.
කඩුලු බිඳ වැටීමේ පීඩනය මෙන්ම සාම්ප්‍රදායික ඉන්දු – පාකිස්තාන පසමිතුරු සටනේ පීඩනයද සමගින් පස්වන කඩුල්ල වෙනුවෙන් පිටියට එක්වූ ඉෂන් කිෂන් සහ හර්දික් පාණ්ඩ්‍යා ඔවුන්ගේ සුපුරුදු පිතිකරණ රටාවෙන් මිදී සෙමින් සෙමින් ඉන්දීය ඉනිම ගොඩ නැගීමට සමත්වූහ.
පීඩනය මැද ඔවුන් දෙදෙනා පස්වන කඩුල්ල වෙනුවෙන් ගොඩනැඟූ සබඳතාව ලකුණු 138කි.
ඉෂන් කිෂන් පන්දු 81කදී ලකුණු 82ක් රැස් කරගනිද්දී, හර්දික් පාණ්ඩ්‍යා පන්දු 90කදී ලකුණු 87ක් රැස්කළේය.
කිෂන්ගේ දැවීයාමත් සමග ඉන්දීය ඉනිමේ අවසන් කඩුලු 5 ලකුණු 62ක් තුළ දැවීගියේය.
ඒ අනුව ඉන්දියාව පන්දුවාර 48යි පන්දු 5කදී සියලුදෙනා දැවී රැස් කරගත් ලකුණු සංඛ්‍යාව 266කි.
විශිෂ්ට පන්දු යැවීමක නිරත වූ ශහීන් ෂා අෆ්රිඩි ලකුණු 35කට කඩුලු 4ක් දවාගත් අතර නෂීම් ෂා සහ හැරිස් රවුෆ් අතර කඩුලු 3 බැගින් බෙදීගියේය.
නමුත් වර්ෂාව හේතුවෙන් පාකිස්තාන කණ්ඩායම ට පිටියට ඒමට අවස්ථාවක් නොලැබුණි.