ජනතාව මත විශාල බදු බරක් පටවා ඇති රජය, මහා පරිමාණයෙන් බැංකු හරහා ණය ලබාගත් පුද්ගලයින්ගෙන් බොල් ණය ලෙස රුපියල් බිලියන 1,200ක් කපා හැරීමට සැලසුම් කර ඇති බව පාර්ලිමේන්තු මන්ත්‍රී පාඨලී චම්පික රණවක මහතා ඊයේ (02) අනාවරණයක් සිදු කළේය.
එහිදී ඔහු වැඩිදුරටත් සඳහන් කළේ ආදායම් සඟවාගෙන විශාල වශයෙන් ඉපැයීම් සිදුකරන ක්ෂේත්‍ර කිහිපයක්ම තිබෙන බවය.
“මූල්‍ය වෙළෙඳපොලේ නියාමනයට, බැංකු සේවා සහ මූල්‍ය සේවාවලට හසු නොවන 44%ක ගනුදෙනුවක් මේ රට ඇතුළේ වෙනවා. උපකාරක සේවා සුළු ගුරුවරු පිරිසක් ඉන්නවා. බිලියන ගණනින් හම්බකරන. ඒවා කොහෙවත් වාර්තා වෙන්නේ නැහැ.”
“මේ රටේ වෛද්‍යවරු, විශේෂඥ වෛද්‍යවරු සුළු පිරිසක් ඉන්නවා අති විශාල විදියට උපයනවා. හැබැයි ඒ විදියට ගෙවන්නේ නැහැ. නීතිඥවරු, ඉංජිනේරුවරු, ව්‍යාපාරිකයෝ ගත්තාමත් ඒවගේමයි. කොටින්ම කට්ටඩිත් ඉන්නවා. ප්‍රකෝටි ගණන් හම්බ කරනවා. තමන්ගේ ආදායම් පෙන්වන්නේ නැහැ. ආණ්ඩුව මුලින්ම අවධානය යොමු කරන්න ඕනේ එතනට. IMF එක මේවා කියන්නේ නැද්ද දන්නේ නැහැ. ආණ්ඩුව හැම වෙලාවෙම මේ කියන කාරණාවලට IMF එකත් දැන් පිළිතුරු දිය යුතුයි. ගිය අවුරුද්දේ නොවැම්බර් මාසෙට ආදායම් බදු නොගෙවන ලද ප්‍රමාණය බිලියන 201ක්.”