ශ්‍රී ලංකාව සහ තායිලන්තය අතර යෝජිත නිදහස් වෙළෙඳ ගිවිසුමට අදාළ තුන්වැනි වටයේ සාකච්ඡා අදින් (09) ආරම්භ වීමට නියමිතව තිබේ.
ඊට සහභාගීවීමට තායිලන්ත වෙළෙඳ සාකච්ඡා දෙපාර්තමේන්තුවේ, අධ්‍යක්ෂ ජනරාල් අවුරමන් සුප්තාවිතුම් මහත්මියගේ ප්‍රධානත්වයෙන් යුත් 26දෙනෙකුගෙන් සමන්විත විශේෂ නියෝජිත කණ්ඩායමක් ඊයේ (08) දිවයිනට පැමිණියේය.
ඒ අනුව දෙරට අතර යෝජිත නිදහස් වෙළෙඳ ගිවිසුමට අදාළ තුන්වැනි වටයේ සාකච්ඡා අද සහ හෙට (10) යන දින දෙක තුළ කොළඹදී පැවැත්වීමට නියමිත බව ජනාධිපති මාධ්‍ය අංශය පැවසුවේය.
භාණ්ඩ වෙළෙඳාම, සේවා වෙළෙඳාම, ආයෝජන, ප්‍රභවස්ථාන රීති, රේගු සහයෝගීතාව හා වෙළෙඳාම් පහසුකරණය සහ ආර්ථික සහයෝගීතාව යන ක්ෂේත්‍ර පිළිබඳව එහිදී විශේෂ අවධානයක් යොමුකිරීමට නියමිතය.
තායිලන්තයට වාසිදායක වෙළෙඳ ශේෂයක් පවතින පසුබිමක් තුළ මෙම සාකච්ඡා ආරම්භ කෙරෙන අතර තායිලන්ත ප්‍රවේශය හරහා මෙරට අපනයන ක්ෂේත්‍රයන් වැඩිදියුණු කිරීම සහ වෙළෙඳාමට පවතින තීරුබදු නොවන වෙළෙඳ බාධක අඩු කිරීම මෙම සාකච්ඡාවල අරමුණ වී තිබේ.
ශ්‍රී ලංකා – තායිලන්ත නිදහස් වෙළෙඳ ගිවිසුම 2024 පළමු කාර්තුවේ දී ක්‍රියාත්මක කිරීමට රජය අපේක්ෂා කරන අතර, දේශීය වාණිජ මණ්ඩල හා කර්මාන්ත සංගම් විසින් ඉදිරිපත් කරන ලද නිශ්චිත ඉල්ලීම් පිළිබඳව ද මෙම සාකච්ඡාවලදී අවධානය යොමු කෙරෙනු ඇත.
දෙරට අතර පවතින ඓතිහාසික රාජ්‍යතාන්ත්‍රික සබඳතා තවදුරටත් ශක්තිමත් කර ගැනිමට සහ නිමි භාණ්ඩ අපනයන වර්ධනය කරගැනීම හරහා දෙරටෙහි ම සංවර්ධන ප්‍රයත්නයන්හි වැදගත් අංගයක් වන ජාත්‍යන්තර වෙළෙඳාමෙහි විශාල ප්‍රගමනයක් ඇති කර ගැනීමට ද රජය මෙමඟින් අපේක්ෂා කරන බව ජනාධිපති මාධ්‍ය අංශය වැඩිදුරටත් සඳහන් කළේය.