මුතුරාජ හස්තියා දෙහිවල සත්වෝද්‍යානය මගින් රැකබලා ගැනීමට අවශ්‍ය පියවර ගන්නා ලෙස වනජීවි අමාත්‍යවරයා විසින් වනජීවි අමාත්‍යාංශ ලේකම්වරිය වෙත උපදෙස් ලබාදී තිබේ.
මුතුරාජා හස්තියා හිටපු ජනාධිපති චන්ද්‍රිකා බණ්ඩාරනායක කුමාරතුංග මැතිණිය වෙත තායිලන්තයෙන් ලබාදුන් පරිත්‍යාගයක් වන අතර එම හස්තියා පසුව ඇය විසින් අලුත්ගම කන්දේ විහාරස්ථානය වෙත භාරදී තිබුණි.
එහෙත් එම හස්තියා භාරව කටයුතු කළ ඇත්ගොව්වාගේ හැසිරීම නිසා එම හස්තියා දැඩි හිරිහැරටවලට මුහුණදුන් බව පසුව අනාවරණය විය.
එහෙයින් මෙරට තායිලන්ත තානාපතිවරයා විසින් මුතුරාජා හස්තියා කන්දේ විහාරස්ථානයෙන් රැ‌ගෙනවිත් දෙහිවල සත්වෝද්‍යානය භාරයට පත් කළ බව වනජීවි හා වන සම්පත් සංරක්ෂණ අමාත්‍යාංශය පැවසීය.
දෙහිවල සත්වෝද්‍යානයේ කාර්යමණ්ඩලය විසින් ලබාදෙන සත්කාර මැද මේ වනවිට එම හස්තියා ඉතාමත් ආරක්ෂිතව පසුවන අතර එම හස්තියා නැවත තායිලන්තයට රැගෙනයාමට මෙරට තායිලන්ත තානාපතිවරයා විසින් තීරණය කර ඇති බව වාර්තා වෙයි.
මුතුරාජා හස්තියා මෙරටම රඳවාගැනීම සම්බන්ධව ඊයේ (15) කෘෂිකර්ම, වනජීවි හා වනසම්පත් සංරක්ෂණ අමාත්‍ය මහින්ද අමරවීර මහතා අමාත්‍යාංශයේ ලේකම් චන්ද්‍රා හේරත් මහත්මිය සමග දීර්ඝ ලෙස සාකච්ඡා කර තිබේ.
ඒ අනුව, මුතුරාජා හස්තියා දෙහිවල සත්වෝද්‍යානයේ තබාගෙන රැකබලා ගැනීමට ජාතික සත්වෝද්‍යාන දෙපාර්තමේන්තුව එකඟත්වය පළකර ඇති අතර තායිලන්ත තානාපතිවරයා සමග සාකච්ඡා කර ඊට අවශ්‍යපියවර ගන්නා ලෙස අමාත්‍යවරයා ලේකම්වරියට උපදෙස් ලබාදී ඇති බව වාර්තා විය.