එළඹෙන උත්සව සමය තුළ මහජන ආරක්ෂාව සහ සාමය තහවුරු කරමින්, එය සාමකාමීව සැමරීමට අවශ්ය පසුබිම සකස් කිරීම සඳහා යුද හමුදා මූලස්ථානය කේන්ද්ර කරගනිමින් “මෙහෙයුම් මැදිරියක්” ස්ථාපිත කිරීමට ආරක්ෂක ලේකම්වරයා උපදෙස් ලබාදී තිබෙනවා.
උත්සව සමය නිමාවන තෙක් අඛණ්ඩව ක්රියාත්මක වන මෙම මෙහෙයුම් මැදිරිය, ත්රිවිධ හමුදාව සහ ශ්රී ලංකා පොලිසිය අතර සමීප සහයෝගීතාවක් සහතික කරන ප්රධාන සම්බන්ධීකරණ කේන්ද්රස්ථානය ලෙස කටයුතු කරනු ඇති බව නිවේදනයක් නිකුත් කරමින් ආරක්ෂක අමාත්යංශය සඳහන් කරනවා.
මෙම ඒකාබද්ධ සම්බන්ධීකරණ යාන්ත්රණයේ මූලික අභිප්රාය වන්නේ, උත්සව සමය තුළ මතු විය හැකි ඕනෑම ආරක්ෂක අභියෝගයකදී හෝ හදිසි තත්ත්වයකදී කඩිනම්, විධිමත් සහ ප්රශස්ත ප්රතිචාර දැක්වීම සහතික කිරීමයි.
යාවත්කාලීන වන තොරතුරු හුවමාරුව ශක්තිමත් කිරීම, කාලෝචිත තීරණ ගැනීම සහ සියලුම ආරක්ෂක අංශවල මෙහෙයුම් සූදානම ඉහළ නැංවීම සඳහා මෙම පියවර ගෙන තිබෙනවා.
මෙම යාන්ත්රණය හරහා උත්සව සමය පුරා මහජන ජීවිත සුරක්ෂිත කිරීමටත්, රජයේ සහ පෞද්ගලික දේපළ ආරක්ෂා කිරීමටත්, බලධාරීන්ට වඩාත් හොඳින් අවස්ථාව සැලසෙන බව ආරක්ෂක අමාත්යංශය සඳහන් කරනවා.
මහජනතාවට කිසිදු බාධාවකින් තොරව සාමකාමීව උත්සව සමය සැමරීමට හැකි වන පරිදි සුරක්ෂිත පරිසරයක් පවත්වාගෙන යාම සඳහා ආරක්ෂක අමාත්යාංශය සතු නොසැලෙන කැපවීම මෙමගින් නැවත වරක් අවධාරණය කෙරෙනවා.