ඉන්දියාවේ ඇති වූ හදිසි ගංවතුර තත්ත්වය හේතුවෙන් කුඩා ළමුන් පස් දෙනෙකු ඇතුළුව පුද්ගලයින් 07 දෙනෙකු ජීවිතක්ෂයට පත්ව ඇතැයි ඉන්දීය මාධ්‍ය වාර්තා කර තිබේ.
ජම්මු හා කාශ්මීරයේ කතුවා නම් දිස්ත්‍රික්කයේ ඊයේ (16) සහ අද දිනයේදී මෙම ආපදාව සිදුව ඇති අතර වලාකුළු පිපිරීම් හේතුවෙන් ඇති වූ අධික වර්ශාවත් සමග නායයාම් හේතුවෙන් මෙම මරණ සිදුව ඇත.
එමෙන්ම මෙම ආපදාවෙන් පුද්ගලයින් පස් දෙනෙකුද තුවාල ලබා ඇති බවත් ඉන්දීය මාධ්‍ය වාර්තා කර ඇත.
මේ අතර එරට කාලගුණ බලධාරීන් ප්‍රකාශ කර ඇත්තේ දිස්ත්‍රික්කය පුරා අධික වර්ෂාපතනයක් ඇදැ හැලෙනු ඇති බවත් සිදුවිය හැකි ආපදාවන්වලින් ආරක්ෂා වන ලෙසත්ය.
එමෙන්ම ගංගා, ඇළදොළ, සහ අනෙකුත් ජල මූලාශ්‍ර ආශ්‍රිතව සිටීමෙන් වළකින ලෙසත් කඳුකර සහ නායයෑම් සහ අනෙකුත් අවදානම් සහිත ප්‍රදේශවලින් වැළකී සිටින ලෙසත් එරට මහජනතාවට අනතුරු අඟවාද තිබේ.
මේ අතර පසුගිය 14 වැනි දින ජම්බු හා කාශ්මීරයේ කිෂ්ට්වාර් ප්‍රදේශයට බලපෑ වළාකුළු පිපිරීමේන් ඇතිවූ හදිසි ගංවතුර තත්ත්වයෙන් පුද්ගලයින් 50කට වැඩි පිරිසක් මිය ගොස් තවත් 100කට අධික පිරිසක් තුවාල ලැබීය.
මචයිල් මාතා කෝවිලට වාර්ෂික වන්දනා ගමන සඳහා විශාල පිරිසක් චිසෝට් හී රැස්ව සිටියදී මෙය සිදුව ඇති අතර අවම වශයෙන් සිද්ධියෙන් පුද්ගලයින් 82කට ආසන්න පිරිසක් අතුරුදන්ව ඇතැයිද වාර්තා විය.