මහනුවර දළදා වීදිය ප්‍රදේශයේ නවාතැන්පොළක අත් විලංගු ජෝඩුවක් දමා ගොස් තිබූ කැලණිය පොලිසියේ පොලිස් සැරෙන්වරයකු අත්අඩංගුවට ගත් බව මහනුවර පොලිසිය පවසයි.
මාසයකට වැඩි කාලයක් එම අත්විලංගු යුවල බෑගයක දමා නවාතැන් පොලේ දමා ගොස් තිබූ බව පොලිස් විමර්ශනවලදී අනාවරණය වී ඇත.
එම නවාතැන් පොලේ කළමනාකරු බෑගය පරීක්ෂා කර බැලීමේදී මෙම අත්විලංගු ජෝඩුව හමුවීමෙන්අනතුරුව එම අත්විලංගු පොලිසියට බාර දී ඇත.
අනතුරුව පොලිසිය සිදුකළ විමර්ශන වලදී එම අත්විලංගු කැලණිය පොලිසියේ සැරයන්වරයකු විසින් දමා ගොස් තිබූ බව අනාවරණය වී තිබුණි.
එම අත් විලංගු යුවල බන්ධනාගාර දෙපාර්තමේන්තුවට අයත් බවට පොලිසිය තොරතුරු අනාවරණය කරගෙන ඇත.
අනතුරුව එම සැරයන්වරයා මහනුවර පොලිසියට කැඳවා ප්‍රකාශයක් සටහන් කර ගැනීමෙන් අනතුරුව රජයේ දේපලක් සාවද්‍ය පරිහරණය හා අවභාවිතා කිරීම සම්බන්ධයෙන් මහනුවර පොලිසියේ නිලධාරීන් විසින් එම සැරයන්වරයා අත්අඩංගුවට ගනු ලැබීය.
අත්අඩංගුවට ගත් සැරයන්වරයා අධිකරණයට ඉදිරිපත් කිරීමට නියමිතව තිබුණි.
මහනුවර කොට්ඨාශ භාර ජ්‍යෙෂඨ පොලිස් අධිකාරී අනුරුද්ධ බණ්ඩාරනායක මහතාගේ උපදෙස් පරිදි මහනුවර පොලිසිය වැඩිදුර විමර්ශන සිදු කරයි.