බටලන්ද වධකාගාරය සම්බන්ධයෙන් දේශපාලනඥයන් පොලිස් ප්‍රධානීන් ඇතුළු පහළොස් දෙනෙකුට එරෙහිව එම වධකාගාරය සම්බන්ධයෙන් කරුණු සොයා බැලූ ජනාධිපති කොමිෂන් සභා වාර්තාවෙන් චෝදනා එල්ල වී ඇත.
නීතිඥ විජේදාස ලියනාරච්චි මහතාගේ මරණය සම්බන්ධයෙන්ද බටලන්ද කොමිෂන් සභා වාර්තාවේ සඳහන් වී ඇත.
එම කොමිසම හමුවේ සාක්ෂි දුන් හිටපු පොලිස්පති අර්නස්ට් පෙරේරා මහතා පවසන්නේ 1988 අගෝස්තු 31 වැනිදා නායකයෙකු දුරකථනයෙන් අමතා නීතිඥ විජයදාස ලියන ආරච්චි කොළඹට ගෙනවිත් භාර දෙන්න ලෙස තමාට දැනුම් දුන් බවයි.
ඒ අනුව ලියනාරච්චි මහතා කැළණිය ප්‍රදේශයේ කඩ කප්පල්කාරී ක්‍රියා මර්දන ඒකකයේ පොලිස් පරීක්ෂක කුලරත්න මහතා භාරගෙන ඇති බව එහි දැක්වේ.
ඉන් දින දෙකකට පසුව දරුණු තුවාල සහිතව කොළඹ ජාතික රෝහලට ඇතුළත් කර ඇති විජයදාස ලියන ආරච්චි මහතාගේ හදවත මධ්‍යම රාත්‍රිය ගත වී පැය භාගයකට පසු නතර වී ඇති බව එම වාර්තාවේ සඳහන්වේ.
නීතිඥවරයාගේ ශරීරයේ මොට ආයුධ වලින් පහර දීමේ තුවාල දෙසීයකට වැඩි සංඛ්‍යාවක් පැවැති බව පශ්චාත් මරණ පරීක්ෂණයේදී අනාවරණය වූයේ යයිද එහි දැක්වේ.
මේ සම්බන්ධයෙන් සෘජුවම හෝ අනියම් ලෙස වගකිවයුතු පුද්ගලයන් අතරට හිටපු නායකයෙකුද ඇතුළත් බව බටලන්ද ජනාධිපති කොමිෂන් සභාවේ වාර්තාවේ සඳහන් වේ.
සිය අමාත්‍ය ධූර බලතල අයුතු ලෙස භාවිත කරමින් පොලිස් නිලධාරීන්ට නිවාස ලබාදීමට නියම කිරීම, බටලන්ද නිවාස සංකීර්ණයේදී පොලිස් නිලධාරීන් කැඳවා රැස්වීම් පැවැත්වීම, පොලිස් රාජකාරියට මැදිහත්වීම සහ නීතිය ක්‍රියාත්මක කිරීමේදී ඊට මැදිහත්වීම නිවාස වල නීති විරෝධී රැඳවුම් මධ්‍යස්ථාන පිහිටුවීම, B2, B8, B34, හා A 1/8 යන නිවාසවල පුද්ගලයන් රඳවා තැබීම සහ වද හිංසනයට ලක් කිරීම ඉහත පුද්ගලයන්ට එල්ල වී ඇති සෙසු චෝදනා බව වාර්තාවේ දැක්වේ.
බටලන්ද වධකාගාරය පවත්වාගෙන යෑම සම්බන්ධයෙන් ජ්‍යෙෂ්ඨ පොලිස් අධිකාරී නලින් දෙල්ගොඩ, සහකාර පොලිස් අධිකාරී ඩග්ලස් පීරිස්,ප්‍රධාන පොලිස් පරීක්ෂක රංජිත් වික්‍රමසිංහ, ඇතුළු පොලිස් නිලධාරීන් පිරිසකට එරෙහිවද වාර්තාවෙන් චෝදනා එල්ල වී ඇත.
එම කොමිෂන් සභා වාර්තාව නිර්දේශ රැසක්ද ලබා දී ඇත.
පුරවැසියන්ගේ මූලික අයිතිවාසිකම් පිට පිටම උල්ලංඝනය කර ඇති හඳුනාගනු ලබන පුද්ගලයන්ගේ ප්‍රජා අයිතිවාසිකම් අහිමි කිරීමේ ස්වරූපයෙන් වූ සුදුසු දඬුවම් එම පුද්ගලයන්ට පැනවීමට අවශ්‍ය අධිකරණ බලය ශ්‍රේෂ්ඨාධිකරණයට පැවරීම,එහි එක් නිර්දේශයක්. පිටු 6780කින් සමන්විත බටලන්ද කොමිෂන් සභා වාර්තාව 1998 මැයි පස්වෙනිදා හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මහත්මියට ලබාදී තිබුණත් එහි නිර්දේශ ක්‍රියාත්මක වී නොතිබූ බව සඳහන්වේ.
අල් ජසීරා රූපවාහිනිය රනිල් වික්‍රමසිංහ මහතා සමග කළ සාකච්ඡාවෙන් පසු මෙම වාර්තාව සම්බන්ධයෙන් මෙරට මෙන්ම විදේශයන්හිද ආන්දෝලනයක් ඇතිවිය.
බටලන්ද කොමිෂන් සභා වාර්තාව ඊයේ පාර්ලිමේන්තුවට ඉදිරිපත් කෙරිණ.