තමාට ස්ථාන මාරුවක් ලැබුණොත් කිසිදු පැකිලීමකින් තොරව ජාතික රෝහලේ නියෝජ්‍ය අධ්‍යක්ෂ ධුරයෙන් ඉවත් වීමට තමා සූදානම් බව වෛද්‍ය රුක්ෂාන් බෙල්ලන මහතා පවසයි.
වෛද්‍ය බෙල්ලන මහතාට රාජ්‍ය සේවා කොමිෂන් සභාව විසින් ස්ථාන මාරුවක් ලබා දි ඇති බවට වාර්තා වන තොරතුරු පිළිබඳ “අද දෙරණ” ඔහුගෙන් විමසීමක් කළේය.
එහිදී ඔහු පැවසුවේ මීට වසර එකහමාරකට පමණ පෙර තමාට බේරුවල රෝහලට ස්ථාන මාරුවක්, රාජ්‍ය සේවා කොමිෂන් සභාවේ අනුමැතියට යටත්ව ලබාදුන් බවය.
කෙසේවෙතත් එය ක්‍රියාත්මක නොවුණු බව සඳහන් කළ වෛද්‍යවරයා පැවසුවේ යළිත් වරක් සෞඛ්‍ය අමාත්‍යාංශයේ ඇතැම් පිරිස් එම ස්ථාන මාරුව සක්‍රීය කිරීමට සූදානමින් පසුවන බවය.
කෙසේවෙතත් මේ වනතෙක් තමාට ස්ථාන මාරුවක් ලැබී නොමැති බව නියෝජ්‍ය අධ්‍යක්ෂවරයා වැඩිදුරටත් ප්‍රකාශ කළේය.
මේ අතර පසුගියදා ජ්‍යෙෂ්ඨ වෛද්‍ය පරිපාලන සේවයේ සම්මුඛ පරික්ෂණ පවත්වා ඇති අතර ඊට වෛද්‍ය රුක්ෂාන් බෙල්ලන මහතා ද සහභාගි වී ඇති බව වාර්තා විය.
කෙසේවෙතත් අද (19) දිනයේ දී වෛද්‍ය රුක්ෂාන් බෙල්ලන මහතා සම්බන්ධයෙන් තීරණයක් ගැනීමට නියමිත බව සෞඛ්‍ය අමාත්‍යාංශ ආරංචි මාර්ග පවසයි .
මේ අතර වෛද්‍ය රුක්ෂාන් බෙල්ලන මහතාගේ ක්‍රියාකලාපයට විරෝධය පළ කරමින් රෝහල් කනිෂ්ඨ කාර්යය මණ්ඩලය අදත් විරෝධතා ක්‍රියාමාර්ගවල නිරත සිටිති.