පොහොර සහනාධාරය ගොවි ජනතාවට ලබාදීමේදී රජයේ මුදල් කෝටි ගණනින් වංචා කිරීමට එරෙහිව සිදු කරන විමර්ශනයන්හිදී පොලිස් අත්අඩංගුවට පත් වීමේ අවදානමක් ඇති හෙයින් ඇප නියම කරන්නැයි පොහොර සමාගමක අධ්‍යක්ෂකවරුන් දෙදෙනකු කළ ඉල්ලීම කොළඹ ප්‍රධාන මහේස්ත්‍රාත් ප්‍රසන්න අල්විස් මහතා අද ප්‍රතික්ෂේප කළේය.
ගොවීන්ට ලබා දීමට නියමිත ව තිබූ රජයේ පොහොර සහනාධාරය අවභාවිතා කිරීම සම්බන්ධයෙන් සිදුකරන විමර්ශනයන්ට සහාය දක්වන ලෙසට පැමිණිලිකරුවන්ට නියෝග කළ මහේස්ත්‍රාත්වරයා අපරාධ පරීක්ෂණ දෙපාර්තමේන්තුව මෙවන් විමර්ශනයක් සිදුකරන බවට මීට පෙර අධිකරණයට කරුණු වාර්තා කර අදාළ නියෝග ලබාගෙන ඇති බවද පෙන්වා දුන්නේය.
ජාතික පොහොර ලේකම් කාර්යාලය 2018 වසරේ දියත් කළ පොහොර සහනාධාර වැඩපිළිවෙළේදී රුපියල් 2500ට ආනයනය කළ පොහොර මිටිය රුපියල් 1100කට ගොවි ජනතාවට ලබා දිය යුතුව තිබියදී රුපියල් 3500කට අලෙවි කර රජයේ මුදල් අවභාවිතා කිරීමට එරෙහිව අපරාධ පරීක්ෂණ දෙපාර්තමේන්තුව මෙම විමර්ශනය ආරම්භ කර ඇත.
එම විමර්ශනයන්හිදී ප්‍රකාශ ලබාදීමට ගිය විට අත්අඩංගුවට පත්වීමේ අවදානමක් ඇති බැවින් පූර්ව ඇපයක් නියම කරන ලෙසට යූරෝ මේඩ් ෆූඩ් ටීච් පුද්ගලික සමාගමේ අධ්‍යක්ෂකවරුන් වන රොෂාන් මධුසංක, මොහොමඩ් අමීන් මොහොමඩ් අශීක් කළ ඉල්ලීම මෙසේ ප්‍රතික්ෂේප කළේය.
අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන අංශයේ ස්ථානාධිපතිවරයා වග උත්තර කරු කරමින් මෙම පැමිණිල්ල ඉදිරිපත් කර තිබිණි.
අපි ඉල්ලීම ප්‍රතික්ෂේප කරමින් මහේස්ත්‍රාත්වරයා මෙසේද පැවසීය.
රජයේ පොහොර සහනාධාරය අවභාවිතා කිරීම සම්බන්ධයෙන් විමර්ශනයක් පවතින හෙයින් අත්තනෝමතිකව අත්අඩංගුවට ගැනීමක් සිදුවන බවට මෙම අවස්ථාවේදී පෙනී යන්නේ නෑ. අනීතික, අසාධාරණ ක්‍රියාවලියක් හෝ දේශපාලන පෙළඹවීමක් මත නිරපරාදේ අත්අඩංගුවට ගැනීමක්ද මෙමගින් ඉස්මතු වන්නේ නෑ.
නඩුවේ අවස්ථා නුගත කරුණු අනුව 1982 අංක 17 දරණ පොදු දේපළ පනත යටතේ විමර්ශනයක් සිදු කරන බවට කරුණු වාර්තා කර තිබෙනවා.පොදු දේපළ පනතෙන් අත්අඩංගුවට ගතහොත් ඇප ලබාදීමේ බලය මහේස්ත්‍රාත් අධිකරණයට නෑ.
නමුත් අත්අඩංගුවට පත් වුවහොත් පැය 24 ක් ඇතුළත පොලිසිය මගින් පුද්ගලයින් අධිකරණයට ඉදිරිපත් කළ යුතු බවත්,එම ඉදිරිපත් කළ අවස්ථාවේ සුවිශේෂී කරුණු ඇත්නම් පමණක් ඇප ලබාදීම සම්බන්ධයෙන් සලකා බැලිය හැකි බවත් මහේස්ත්‍රාත්වරයා සඳහන් කළේය.