මඩොල්සිම පුංචි ලෝකාන්තය අසල පිහිටි රාගල සානුව ආසන්න ප්‍රදේශයේ උපන්දින සාදයක් පැවැත්වීමට ගිය තරුණයින් දෙදෙනෙක් අනතුරට ලක්ව තිබේ.
අප වාර්තාකරු පැවසුවේ එම ස්ථානයේ ප්‍රපාතයකට ඇදවැටී ඇති තරුණයින් දෙදෙනා බරපතළ තුවාල ලබා බදුල්ල ශික්ෂණ රෝහලට ඇතුළත් කළ බවය.
අනතුරින් තුවාල ලබා ඇත්තේ, පස්සර ප්‍රදේශයේ පදිංචි 25 හැවිරිදි තරුණයින් දෙදෙනෙකි.
තරුණයින් අතරින් එක් අයෙකුගේ උපන්දිනයක් ඊයේ (23) දිනයට යෙදී ඇති අතර, ඔහු තවත් මිතුරන් සිව්දෙනෙකු සමග පුංචි ලෝකාන්තයට පහළින් පිහිටි රාගල සානුව නැමති ස්ථානයට ගොස් එහි මත්පැන් සාදයක් පවත්වා ඇත.
සාදය අතරතුර උපන්දිනය යෙදී තිබු තරුණයා ගලකින් පහළට ලිස්සා ගොස් ඇති අතර, ඔහුව බේරාගැනීමට උත්සාහ කිරීමේ දී මිතුරාද ප්‍රපාතයට ඇදවැටී ඇතැයි පොලීසිය පවසයි.
තුවාලකරුවන් දෙදෙනාගේම තත්ත්වය බරපතළ බව බදුල්ල මහරෝහලේ හදිසි ප්‍රතිකාර අංශයේ ජ්‍යෙෂ්ඨ වෛද්‍ය නිලධාරි පාලිත රාජපක්ෂ මහතා පැවසීය.
බදුල්ල ජ්‍යෙෂ්ඨ පොලිස් අධිකාරී සුජිත් වෙදමුල්ල මහතාගේ උපදෙස් මත මඩොල්සිම පොලීසිය මේ පිළිබදව විමර්ශන සිදුකරයි.