අවිස්සාවේල්ල, දුනුමාල ප්‍රදේශයේ දී වෙඩි තබා පුද්ගලයෙකු ඝාතනය කිරීමේ සිද්ධියට සම්බන්ධ සැකකරුවෙකු මීතොටමුල්ල ප්‍රදේශයේ දී කොළඹ අපරාධ කොට්ඨාසය මඟින් අත්අඩංගුවට ගෙන තිබේ.
වරකාපොළ ප්‍රදේශයේ පදිංචිකරුවෙකු වන 33 හැවිරිදි සැකකරු සතුව තිබී හෙරොයින් ග්‍රෑම් 5ක් ද සොයාගත් බව පොලීසිය පැවසුවේය.
මොහු පසුගිය ජුලි මස 14 වැනිදා සිදුවු අදාළ ඝාතනය සඳහා පැමිණි යතුරුපැදියේ පැදිකරු ලෙස කටයුතු කර ඇති බවටත් විදෙස්ගතව සිටින සංවිධානාත්මක අපරාධකරුවන් දෙදෙනෙකුගේ උපදෙස් මත එම ඝාතනය සිදුකර ඇති බවටත් සැකකරුගෙන් සිදුකළ ප්‍රශ්න කිරීම්වල දී අනාවරණය වී තිබේ.
ඝාතනයට ලක්වූ පුද්ගලයා විසින් පැළද සිටි රන්මාල දෙකක් උකස් කරන ලද රිසිට් පත් ද සැකකරු සතුව තිබී සොයාගත් බව පොලීසිය පැවසුවේය.
එමෙන්ම සිදුකළ වැඩිදුර ප්‍රශ්න කිරීම්වල දී නිට්ටඹුව ප්‍රදේශයේ පුද්ගලයෙකු ඝාතනය කිරීම සඳහා සැකකරුට විදෙස්ගතව සිටින අපරාධකරුවෙකු විසින් තවත් කොන්ත්‍රාත්තුවක් ලබාදී ඇති බවට ද අනාවරණය වූ බව පොලීසිය සඳහන් කළේය.
ඒ සඳහා ලබාදුන් ගිනිඅවිය හා ජීව උණ්ඩ 8ක් රාගම ප්‍රදේශයේ පිහිටි නිවසක සඟවා තිබියදී සොයාගෙන ඇති අතර ඒවා සැඟවීම සඳහා ආධාර අනුබල ලබාදුන් පුද්ගලයෙකු ද එහිදී කොළඹ අපරාධ කොට්ඨාසය මඟින් අත්අඩංගුවට ගෙන තිබේ.
සැකකරුවන් අලුත්කඩේ සහ මහර මහෙස්ත්‍රාත් අධිකරණ වෙත ඉදිරිපත් කිරීමට නියමිත බව පොලීසිය පැවසුවේය.