ඉන්දීය අගමැති නරේන්ද්‍ර මෝදි මහතාගේ ශ්‍රී ලංකා සංචාරය අතරතුර බලශක්ති, සෞඛ්‍ය, ආරක්ෂක සහ ඩිජිටල් ඇතුලු ද්විපාර්ශවික ගිවිසුම් කිහිපයකට එළැබීමට රජය අදහස් කර ඇතැයි කැබිනට් මාධ්‍ය ප්‍රකාශක, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා කොළඹ දී පැවසීය.
මෙයට අමතරව ඉන්දීය අගමැතිවරයා සහ මෙරට ජනාධිපති සමඟ ද්විපාර්ශවික සාකච්ඡා ඇතුලු වැඩසටහන් රැසක් මෙම සංචාරය අතරතුර සිදුවන බවත් අමාත්‍යවරයා සඳහන් කළේය.
කැබිනට් තීරණ දැනුම් දීමේ මාධ්‍ය හමුවේදී ඉන්දීය අගමැති නරේන්ද්‍ර මෝදි මහතාගේ ශ්‍රී ලංකා සංචාරය සම්බන්ධයෙන් මාධ්‍යවේදීන් කළ විමසීමේදී තවදුරටත් අදහස් දැක්වූ අමාත්‍ය වෛද්‍ය නලින්ද ජයතිස්ස මහතා මෙසේද කීවේය.
“ඉන්දීය අගමැති නරේන්ද්‍ර මෝදි මහතා හෙට(04) වැනිදා දිවයිනට පැමිණීමට නියමිතයි. 05 වැනිදා සහ 06 වැනිදා යොදාගත් විශේෂ වැඩසටහන් තිබෙනවා. අප්‍රේල් 05 වැනිදා උදෑසන නිදහස් චතුරස්‍රයේ දී ඉන්දීය අගමැති නරේන්ද්‍ර මෝදි මහතා පිළිගැනීම සිදුවෙනවා. ඉන් අනතුරුව ජනාධිපතිවරයා සමඟ ද්විපාර්ශවික සාකච්ඡාවක් පැවැත්වෙනවා. ඉන්පසු ඉන්දීය අගමැතිවරයාත් අපේ ජනාධිපතිවරයාත් ඒ සම්බන්ධයෙන් මාධ්‍යවලට විශේෂ ප්‍රකාශ නිකුත් කිරීමට නියමිතයි.