ශ්‍රී ලංකාව සහ ඉන්දියාව අතර යටිතල පහසුකම් අංශයෙන් ඇති හවුල්කාරිත්වය තවත් දැඩි කරමින් ජනාධිපති අනුර කුමාර දිසානායක මහතාගේ තෙදින ඉන්දීය නිල සංචාරයේදී මහව – අනුරාධපුර දුම්රිය මාර්ගයේ සංඥා පද්ධතියක් ඉදිකිරිම සඳහා ඇමෙරිකානු ඩොලර් මිලියන 14.9 ප්‍රදානයක් ඉන්දීය රජය ලබාදුන් බව ශ්‍රී ලංකාවේ ඉන්දීය මහා කොමසාරිස් සන්තෝෂ් ජා මහතා පසුගිය (07) ප්‍රකාශ කළේය.
මෙරට මාධ්‍යවේදීන් පිරිසක් සමග ශ්‍රී ලංකාවේ ඉන්දීය මහා කොමසාරිස් කාර්යාලයේදී පැවැති සාකච්ඡාවක් අතරතුර ඔහු මෙම අදහස් පළ කළේය.
පවතින ශිෂ්‍යත්ව වැඩසටහන්වලට අමතරව යාපනය සහ නැගෙනහිර විශ්වවිද්‍යාලවල ඉගෙනුම ලබන අඩු ආදායම්ලාභී සිසුන් 200 කට (එක් විශ්ව විද්‍යාලයකට සිසුන් 100 බැගින්) පූර්ණ ශිෂ්‍යත්ව ලබාදීමේ වැඩසටහනක්ද ජනාධිපතිවරයාගේ තෙදින නිල සංචාරයේදී ප්‍රකාශයට පත් කෙරෙනු බව ඉන්දීය මහ කොමසාරිස්වරයා පැවැසුවේය.
වසර 5 ක කාලයක් පුරාවට ශ්‍රී ලංකාවේ රාජ්‍ය සේවකයන් 1500 ක් පුහුණු කිරීම සඳහා ශ්‍රී ලංකාව සහ ඉන්දියාව අතර අවබෝධතා ගිවිසුමකටද නිල සංචාරයේදී අත්සන් තැබූ බව සන්තෝෂ් ජා මහතා ප්‍රකාශ කළේය. එසේම ද්විත්ව බදුකරණය මග හැරීම සඳහා වන අවබෝධතා ගිවිසුමකටද ජනාධිපතිවරයාගේ තෙදින නිල සංචාරයේදී අත්සන් තැබූ බව ඉන්දීය මහ කොමසාරිස්වරයා පැවැසුවේය.
ජනාධිපති අනුර කුමාර දිසානායක මහතාගේ තෙදින ඉන්දීය නිල සංචාරයේදී ශ්‍රී ලංකාවේ වගවීම පිළිබඳව ඉන්දීය අග්‍රාමාත්‍යවරයා සහ ශ්‍රී ලංකා ජනාධිපතිවරයා සවිස්තරාත්මක සාකච්ඡාවක් පැවැත්වුණු බවද සන්තෝෂ් ජා මහතා ප්‍රකාශ කළේය. එහිදී සම්පූර්ණ සහ ඵලදායී අයුරින් ආණ්ඩුක්‍රම ව්‍යවස්ථාව ක්‍රියාත්මක කරන ලෙස ඉන්දීය අග්‍රාමාත්‍ය නරේන්ද්‍ර මෝදි මහතා ජනාධිපති අනුර කුමාර දිසානායක මහතාගෙන් ඉල්ලා සිටි බව ඉන්දීය මහ කොමසාරිස්වරයා පැවැසුවේය.