ජාතික ජන බලවේගයේ පාර්ලිමේන්තු මන්ත්‍රී අනුර කුමාර දිසානායක මහතා ජනාධිපති ධුරයට පත්වීමෙන් හිස්වන එම මන්ත්‍රී ධූරය සඳහා මැතිවරණ කොමිෂන් සභාව විසින් ජනතා විමුක්ති පෙරමුණේ හිටපු පාර්ලිමේන්තු මන්ත්‍රීවරයකු වන ලක්ෂ්මන් නිපුනාරච්චි මහතා පත් කරනු ලැබ ඇත.
මීට අදාළ ගැසට් නිවේදනය අද (23) නිකුත් කෙරිණි.
අනුර දිසානායක මහතාගෙන් පසු කොළඹ දිස්ත්‍රික් ජාතික ජන බලවේග ලැයිස්තුවේ මීළඟට වැඩිම මනාප ලබාගෙන සිටියේ ලක්ෂ්මන් නිපුණාරච්චි මහතාය.
තමා පාර්ලිමේන්තු මන්ත්‍රී ධූරයෙන් ඉල්ලා අස්වන බව අනුර කුමාර දිසානායක මහතා පාර්ලිමේන්තු මහ ලේකම් නීතිඥ කුෂානි රෝහණදීර මහත්මියට දැනුම් දුන්නේය. මේ අනුව පාර්ලිමේන්තුවේ මන්ත්‍රී ධූරයක් පුරප්පාඩු වී පවතින බව පාර්ලිමේන්තු මහ ලේකම්වරිය මැතිවරණ කොමිෂන් සභාවට දැනුම් දුන්නාය.
ලක්ෂ්මන් නිපුනාරච්චි මහතා පත් කෙරුණේ ඒ අනුවය.
නිපුණාරච්චි මහතා එම මන්ත්‍රී ධූරයේ ලබන මස 8 වැනිදා දිවුරුම් දීමට නියමිතය.