දේශබන්දු තෙන්නකෝන් මහතා පොලිස්පති ධූරයේ කටයුතු කිරීම වළකාලමින් ශ්‍රේෂ්ඨාධිකරණය නිකුත් කර ඇති අතුරු නියෝගය ඉවත දමන්නැයි ඉල්ලා බෙල්ලන්විල රජමහා විහාරාධිපති ආචාර්ය බෙල්ලන්විල ධර්මරත්න හිමියන් ඇතුළු හිමිවරු තිදෙනකු ගොනුකොට ඇති අතරමැදි පෙත්සම සම්බන්ධයෙන් විරෝධතා ඇත්නම් ලබන 13 වැනිදාට පෙර ගොනු කරන ලෙස අගරදගුරු මැල්කම් රංජිත් කාදිනල් හිමිපාණන් ඇතුළු පාර්ශ්වකරුවන්ට ශ්‍රේෂ්ඨාධිකරණය ඊයේ (06) නියෝග කළේය.
අතරමැදි පෙත්සම අධිකරණයේ කැඳවූ අවස්ථාවේදී ඉදිරිපත් ුවු කරුණු සළකා බැලීමෙන් අනතුරුව එලෙස නියෝග කළ ශ්‍රේෂ්ඨාධිකරණය අතරමැදි පෙත්සමට පාදක වු මුල් පෙත්සම විභාග කළ විනිසුරු මඩුල්ල හමුවේ අතරමැදි පෙත්සම කැඳවීමටද නියම කළේය.
ශ්‍රේෂ්ඨාධිකරණ විනිසුරුවරුන් වන යසන්ත කෝදාගොඩ, ජනක් ද සිල්වා සහ අර්ජුන ඔබේසේකර යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ලක් හමුවේ පෙත්සම සලකා බැලිණි.
බෙල්ලන්විල රජමහා විහාරාධිපති ආචාර්ය බෙල්ලන්විල ධර්මරත්න, කොල්ලූපිටිය රාහුල හිමි සහ මහාචාර්ය අගලකඩ සිරිසුමන යන හිමිවරුන් විසින් මෙම අතරමැදි පෙත්සම ගොනුකොට ඇත.
දේශබන්දු තෙන්නකෝන් මහතා පොලිස්පතිධූරයේ කටයුතු කිරීමට එරෙහිව අගරදගුරු මැල්කම් කාදිනල් රංජිත් හිමි ඇතුළු පිරිසක් විසින් මෙහි මුල් පෙත්සම ගොනුකොට ඇත.
එම පෙත්සම විභාගයට ගැනීමෙන් පසුව පසුගිය ජූලි 24 වැනිදා දේශබන්දු තෙන්නකෝන් මහතා පොලිස්පතිධුරයේ කටයුතු කිරීම වළකාලන අතුරු නියෝගයක් ශ්‍රේෂ්ඨාධිකරණය නිකුත් කෙරිණී.
ඊට එරෙහිව හිමිවරුන් තිදෙනෙකු විසින් අතරමැදි පෙත්සමක් ගොනු කරමින් දේශබන්දු තෙන්නකෝන් මහතා පොලිස්පතිධූරයේ කටයුතු කිරීම වළකාලමින් නිකුත් කර ඇති අතුරු නියෝගය ඉවත් කර ඒ මහතාට එරෙහිව ගොනුකොට ඇති පෙත්සම නිෂ්ප්‍රභ කරන ලෙස ඉල්ලා සිටිති.
අතරමැදි පෙත්සම කැඳවු අවස්ථාවේදී අතරමැදි පෙත්සම්කාර හිමිවරුන් වෙනුවෙන් පෙනී සිටි ජනාධිපති නීතිඥ මනෝහර සිල්වා මහතා කරුණු දක්වමින් අතරමැදි පෙත්සම් සම්බන්ධයෙන් මැතිවරණයට පෙර කරුණු තහවුරු කිරීම අත්‍යවශ්‍ය බැවින් ඉතා කෙටි දිනයක් ලබාදෙන්නැයි ඉල්ලා සිටියේය.