අප්‍රිකා කලාපීය රටවලින් පළමු වරට හඳුනා ගත්, ඉතා වේගයෙන් ව්‍යාප්තවීමේ හැකියාවක් ද ඇති, ‘එම් පොක්ස්’ හෙවත් ‘වඳුරු උණ’ වයිරසයේ නව ප්‍රභේදය, තායිලන්තයට ව්‍යාප්ත වී ඇත.
ඒ අනුව, ‘එම් පොක්ස් ක්ලේඩ් 1බී’ නමැති එම වයිරස ප්‍රභේදය අප්‍රිකාවෙන් පිට, ආසියානු රටකින් හමුවුණු පළමු අවස්ථාව මෙය ලෙස සැලකෙයි.
රෝග ලක්ෂණ පෙන්නුම් කළ, බැංකොක් අගනුවරට ආ ගුවන් මගියකු වෛද්‍ය පරීක්ෂණවලට යොමු කළ විට, ඔහු ‘එම් පොක්ස් ක්ලේඩ් 1බී’ නව වයිරස ප්‍රභේදය ආසාදනය වූ තැනැත්තකු බව තහවුරු කරගත් බව තායිලන්ත සෞඛ්‍ය අංශ පවසයි.
එම ආසාදිතයා 66 හැවිරිදි යුරෝපා ජාතිකයකු බවත්, ඔහු බැංකොක් අගනුවර බලා පැමිණ ඇත්තේ අප්‍රිකාවේ සිට මහා බ්‍රිතාන්‍යය හරහාය.
ආසාදිතයා සමඟ සමීප ඇසුරක් පැවැත්වුණු 43 දෙනකු හඳුනා ගැනීමට තායිලන්ත සෞඛ්‍ය බලධාරීන් සමත් වී ඇති අතර, ඔවුන් එම 43 දෙනා ගැන විමසිල්ලෙන් පසුවන බව ද වාර්තා වේ.
‘එම් පොක්ස්’ වයිරසය ලොව පුරා ව්‍යාප්තවීමට පටන් ගත්තේ 2022 වසරේදී, ‘කොවිඩ් 19’ වයිරසයේ සැර බාල වෙද්දීය. ‘එම් පොක්ස්’ වයිරසය ‘කොවිඩ් 19’ තරම් බිහිසුණු නොවන නමුත්, ඒ ගැන අවධානයෙන් පසුවිය යුතු බව ලෝක සෞඛ්‍ය සංවිධානය අනතුරු අඟවා ඇත. ‘එම් පොක්ස්’ ආසාදිතයන් වන්නේ, සමලිංගිකයන්ය. 2022 වසරේ සිට මේ දක්වා තායිලන්තයෙන් වාර්තා වුණු ‘එම් පොක්ස්’ ආසාදිතයන් ගණන 800 කි.