ජාතික ජල සම්පාදන හා ජලාපවහන මණ්ඩලයේ ප්‍රාදේශීය වැඩභාර නිලධාරීන්ගේ ඇතැම් කාර්යාලවලට සේවකයන් සපයන පෞද්ගලික සමාගම්වලින් සේවකයන් ගන්නා බව පවසමින් මුදල් වංචාවක් වන බව එම මණ්ඩලයේ සේවකයෝ පවසති.
කොළඹ දිස්ත්‍රිකය ඇතුළු දිස්ත්‍රික්ක රැසක වැඩභාර නිලධාරීන්ගේ කාර්යාල කීපයකම ප්‍රධානීන් සේවකයන් දෙදෙනා බැගින් පෞද්ගලික සමාගම්වලින් බඳවාගත්තේ යැයි පවසමින් ඔවුන්ට හිතවත් පුද්ගලයන්ගේ නම් එම මණ්ඩලයට යොමුකර වැටුප් ගන්නා බවත් ඇතැම් වැඩභාර නිලධාරීන්ගේ කාර්යාලවලින් වසර දෙක තුන එවැනි දීර්ඝ කාලයක සිට මෙම වංචා ආකාරයට මුදල් ගන්නා බවත් සේවකයෝ කියති.
කොළඹ නගරයේ වැඩභාර නිලධාරීන්ගේ කාර්යාලයක් එය පාලනය කරන ප්‍රාදේශීය ලොක්කෙකුගේ පූර්ණ ආශීර්වාදයෙන් මෙම වංචාව ක්‍රියාත්මක කරන බව කී සේවකයෝ එම සාමූහික වංචාවක් හැටියට ක්‍රියාත්මක වන බව ද වැඩි දුරටත් සඳහන් කළේය.
මෙම සිද්ධිය සම්බන්ධයෙන් ජාතික ජල සම්පාදන හා ජලාපවහන මණ්ඩලයේ නියෝජ්‍ය සාමාන්‍යාධිකාරි (වාණිජ) පියල් පත්මනාත මහතාගෙන් කළ විමසුමකදී පැවසුවේ එවැනි වංචාවක් සම්බන්ධයෙන් මෙතෙක් වාර්තා වී නොමැති බවත් එය ජල සම්පාදනය මණ්ඩලයේ විමර්ෂණ අංශයට යොමුකළ හැකි බවත්ය.