ලංකා විදුලිබල මණ්ඩලය පසුගිය වසරේ ලැබු අති විශාල ලාභය හැකි ඉක්මණින් විදුලි පාරිභෝගිකයින් වෙත බෙදාහැරිය යුතු බව ශ්‍රී ලංකා මහජන උපයෝගිතා කොමිෂන් සභාවේ හිටපු සභාපති ජනක රත්නායක මහතා අද (7) පැවසීය.
ජනක රත්නායක මහතා කොළඹදී ඊයේ (7) පස්වරුවේ පැවැති විශේෂ මාධ්‍ය හමුවේදී එසේ පැවසීය.
විදුලි පාරිභෝගිකයින් මත අසාධාරණ බර පැටවීමෙන් විදුලිබල මණ්ඩලය පසුගිය වසරේ අවසාන කාර්තුවේදී රුපියල් කෝටි 5000කට අධික ලාභයක් ලැබූ බවත් විදුලි බල පනතේ 30 වැනි වගන්තියට පටහැනිව අනුමත කළ අනීතික ගාස්තු වැඩිකිරීමක් හරහා එම ලාභය ලැබූ බවත් රත්නායක මහතා කීය.
ලංකා විදුලිබල මණ්ඩලය අසාධාරණ ලෙස උපයාගත් කෝටි 5000 විදුලි පාරිභෝගිකයින්ට වාහාම බෙදාදිය යුතු බව කී ජනක රත්නායක මහතා පැවසුවේ ඉදිරි ගාස්තු සංශෝධනයකදි සියයට 50කින් ගාස්තු අඩුකරන බවට කරන ප්‍රකාශ විදුලි පාරිභෝගිකයා නොමග යැවීමක් බව ද සඳහන් කළේය.
ඉදිරි ගාස්තු සංශෝධනය කළ යුත්තේ ඉදිරියේ පැවතිය හැකි විදුලි ඉල්ලුම, සැපයුම සහ වියදම් ඇස්තමේන්තු මත විදුලිබල පනතේ 30 වන වගන්තියෙන් පැහැදිලිව දක්වා තිබෙනවා විදුලි ගාස්තු සංශෝධකනය කළ යුතු ආකාරයට අනුව බව කී ඒ මහතා සඳහන් කළේ විදුලිය සැපයීම සඳහා සාධාරණ වියදම සපයා ගැනීමට පමණක් බවත්ය.
ශ්‍රී ලංකා මහජන කොමිෂන් සභාව පසුගිය වසරේ කළ වැරැද්ද නිවැරැදි කිරීම සඳහා පලමුවෙන්ම වාහාම මණ්ඩලය ලැබූ අධික ලාභය විදුලි පාරිභෝගිකයා අතර සාධාරණ ලෙස බෙදිය යුතු බවත් ඉදිරි ගාස්තු සංශෝධන නිවැරැදිව කිරීමට නම් ස්වාධීනව ක්‍රියාකරන, විදුලිබල කර්මාන්තය පිළිබද දැනුම ඇති වෘත්තිකයින් කොමිෂන් සභාවට පත් කළ යුතු බවත් ඒ මහතා කීය.
වර්තමානයේ ක්‍රියාත්මක විදුලිබල පනත ශ්‍රී ලංකා මහජන උපයෝගිතා කොමිෂන් සභා පනතත්, ශ්‍රී ලංකා විදුලිබල පනතත් පාරිභෝගික ආරක්ෂාව සහ ස්වාධීනත්වය සම්බන්ධයෙන් ශක්තිමත් ප්‍රතිපාදන සහිත පනත් දෙකක් බව කී ජනක රත්නායක මහතා යෝජිත පනත් කෙටුම්පත සකස් කර ඇත්තේ විදුලිබල කර්මාන්තය, නියාමනය හා පාරිභෝගික අයිතිවාසිකම් පිළිබද අබමල් රේණුවක දැනුමක් ඇති පිරිසක් නොවන බව ද වැඩි දුරටත් සඳහන් කළේය.