ලංකා පොදුජන පෙරමුණ සිය නව නිලධාරී මණ්ඩලය අද පත්කළ අතර හිටපු අමාත්‍ය බැසිල් රාජපක්ෂ දරන ලද ජාතික සංවිධායක ධුරය පුරප්පාඩුව තැබූ බව හම්බන්තොට දිස්ත්‍රික් පාර්ලිමේන්තු මන්ත්‍රී නාමල් රාජපක්ෂ පැවසීය.
පක්ෂයේ නායක මහින්ද රාජපක්ෂගේ කොළඹ නිල නිවසේදී රැස්වූ පක්ෂයේ විධායක සභාව මෙම තීරණයට එළඹ තිබෙන බව නාමල් රාජපක්ෂ මහතා කීය.
ඊළඟ විධායක සභාවේදී ජාතික සංවිධායක ධුරය සඳහා පත් කිරීම කරනු ඇතැයි ද බොහෝ විට අලුත් මුහුණක් ඊට පත් කෙරෙනු ඇතැයි ද දැනගන්නට ඇත.
පොදුජන පෙරමුණේ මහලේකම් ලෙස පාර්ලිමේන්තු මන්ත්‍රී සාගර කාරියවසම් මහතා ද නව භාණ්ඩාගාරික ලෙස පාර්ලිමේන්තු මන්ත්‍රී පවිත්‍රා වන්නිආරච්චි මහත්මිය ද පත්කර තිබේ.
පක්ෂයේ සභාපතිවරයා ලෙස උතුරාවල ධම්මරතන හිමියන් යළි පත්කිරීමටද පියවර ගෙන ඇත. ශ්‍රී ලංකා පොදුජන පෙරමුණ ද සිය දේශපාලන මණ්ඩලයටද සාමාජිකයන් පත්කර ඇති අතර, එහිදී නියෝජ්‍ය ජාතික සංවිධායක තනතුරු ද මෙවර අලුතින් ස්ථාපිත කර තිබේ.
මෙම තනතුරු සඳහා දෙමළ සහ මුස්ලිම් නියෝජිතයන් පසුව තෝරාගැනීමට පක්ෂය අපේක්ෂා කරන බවද නාමල් රාජපක්ෂ මහතා කීය.