කොල්ලුපිටියේ සුපිරි හෝටලයකදී රුපියල් හත් කෝටි අසූහත් ලක්ෂ පනස් දහසක් සමඟ අත් අඩංගුවට ගත් සැකකරුවන් අට දෙනා එක් එක් සැකකරුට රුපියල් ලක්ෂ 10 බැගින් වූ ශරීර ඇප මත නිදහස් කිරීමට කොටුව මහේස්ත්‍රාත් තිළිණ ගමගේ මහතා ඊයේ(13) නියෝග කළේය.
එම මුදල් ළඟ තබාගෙන සිටි සැකකරුවන් සේවය කළ සමාගමේ අධ්‍යක්ෂකවරයා 9 වැනි සැකකරු ලෙස නම් කිරීමට මහේස්ත්‍රාත් තිළිණ ගමගේ මහතා අවසර ලබා දුන් අතර 9 වැනි සැකකරුද ලක්ෂ 10 ක ශරීර ඇපයක් මත නිදහස් කිරීමට මහේස්ත්‍රාත් තිළිණ ගමගේ මහතා නියෝග කළේය.
එසේම 9 වැනි සැකකරුට ප්‍රකාශයක් ලබා දීම සඳහා අපරාධ පරීක්ෂණ දෙපාර්තමේන්තුවේ පෙනී සිටින ලෙසද මහේස්ත්‍රාත් තිළිණ ගමගේ මහතා නියෝග කළේය.
නඩු භාණ්ඩ වශයෙන් අත් අඩංගුවට ගත් රුපියල් හත් කෝටි අසූහත් ලක්ෂ පනස් දහසක මුදල, ගමන් ගත් වාහන දෙක සහ මුදල් ගනින යන්ත්‍රය නැවතත් සමාගමට මුදා හරින ලෙසද මහේස්ත්‍රාත් තිළිණ ගමගේ මහතා නියෝග කළේය.
එසේම විත්තිකාර සමාගම අතුරුදන් වී ඇතැයි පවසන දෙලක්ෂ පනස් දහසක මුදල පිළිබඳ විශේෂ විමර්ශන ඒකකය මගින් විමර්ශනයක් සිදුකරන ලෙසද මහේස්ත්‍රාත් තිළිණ ගමගේ මහතා නියෝග කළේය.