වෙළෙඳසලක් මංකොල්ලකා එහි සිටි කාන්තාවකට පෙට්‍රල් ගසා ගිනිතැබීමට තැත්කිරීමේ සිද්ධියක් කිරිඇල්ල කුරුගම්මෝදර ප්‍රදේශයෙන් වාර්තා වෙයි.
අද (01) අලුයම 05ට පමණ රත්නපුර – පානදුර මාර්ගයේ කිරිඇල්ල කුරුගම්මෝදර හංදියේ පිහිටි සිල්ලර වෙළෙඳසලක් තුළ මෙම සිද්ධිය ඇතිවී තිබේ.
වෙළෙඳසලට ඇතුළුවූ දෙදෙනෙකු එහි සිටි කාන්තාවකගේ මුදල් බෑගය මංකොල්ලකා ඇයට පෙට්‍රල් ගසා ගිනිතැබීම හේතුවෙන් එම වෙළෙඳසල සම්පූර්ණයෙන්ම ගිනිගෙන විනාශ වී තිබේ.
අදාළ කාන්තාව ගින්නෙන් බේරීමට කටයුතු කර තිබුණි.
එම වෙළෙඳසල හිමි අදාළ කාන්තාව අලෙවි කිරීම සඳහා අද අලුයම එළවළු රැගෙනඒමට රත්නපුර පොදු වෙළෙඳපොළට යෑමට සූදානමින් සිටි අවස්ථාවේදී මෙම සිද්ධිය ඇතිවී තිබුණි.
එහිදී වෙළෙඳසලේ පිටුපස දොර විවෘත කරනවාත් සමගම වෙළෙඳසල තුළට ඇතුළුවී ඇති නාඳුනන පුද්ගලයින් දෙදෙනෙකු රුපියල් ලක්ෂයකට ආසන්න මුදලක් සහිත ඇයගේ බෑගය කොල්ලකා පෙට්‍රල් ගසා ගිනිතබා තිබේ.
ඇසිඩ් ප්‍රහාරයක් එල්ලවූ බව සිතා එම කාන්තාව වෙළෙඳසල තුළ සිට පිටතට දුවගොස් ඇති අතර ඒත් සමගම වෙළෙඳසැල ගිනිගෙන ඇත.