සුජිත් සංජය පෙරේරා මන්ත්‍රීවරයා බෙල්ල තද කළ අවස්ථාවේදී තමාට සෙරෙප්පුව ගලවා ගැනීමට හැකිවුණා නම් වෙන දේ බලා ගැනීමට තිබූ බව සංචාරක රාජ්‍ය ඇමතිනී ඩයනා ගමගේ මහත්මිය පැවසුවාය.
ඩයනා ගමගේ මහත්මිය මෙසේ පැවසුවේ කොළඹදී ඊයේ (23) පැවති ප්‍රවෘත්ති සාකච්ඡාවකදීය.
පාර්ලිමේන්තු පරිශ්‍රයේදී පසුගිය 20 වැනිදා සිදුවූ ගුටිබැට හුවමාරුව සම්බන්ධයෙන් කරුණු දැක්වීම සඳහා මෙම ප්‍රවෘත්ති සාකච්ඡාව කැඳවා තිබිණ.
ගමගේ මහත්මිය මෙසේද සඳහන් කළාය.
මම එතන කිසිම අසභ්‍ය දෙයක් දකින්නේ නෑ. මම අසභ්‍ය වචන කිව්වේත් නෑ. අසභ්‍ය වචන කිව්වේ ඒ අය. මම ඒ අයට ඒ අසභ්‍ය වචන මතක් කර දෙමින් මේවා කාන්තාවන්ට නොගැලපෙන බව ප්‍රකාශ කළා. මේකෙ ඇත්ත සීසීටීවී දර්ශන කතානායකවරයා ළඟ තියෙනවා. ඒක එළියට ආවම ඇත්ත බලාගන්න පුළුවන්. මම රෝහණ බණ්ඩාරට කියන්නේ එක වචනයයි. ඒ වචනය කිව්වේ අපරාදේ. ඒ වචනයත් එයාට ගැලපෙන්නේ නැහැ.
ඔය සුජිත් පෙරේරා කියන මන්ත්‍රිතුමා එක්ක මගේ සම්බන්ධයක් නැහැ. කතාවකුත් නැහැ. මගේ බෙල්ල තද කරපු වෙලාවේ තමයි මම මගේ බෑග් එකෙන් පහර දෙන්නෙ.
මනුස්සයකුට ඉවසීමක් තියෙනවා.ඒ වගේම ඉවසීමේ සීමාවකුත් තියෙනවා. තද කරපු වෙලාවේ මගේ බෙල්ලට මොකක් හරි වුණානම්. ඒක දරුණු ප්‍රහාරයක්. සෙරෙප්පුව ගලවා ගන්න බැරුව හිටියේ. බෑග් එක විතරයි අතේ තිබ්බෙ.
ආදරයයි වෛරයයි අතර තියෙන්නෙ කෙස් ගහක වෙනසක් කියලා කියනවා.එහෙම කේස් එකක් තිබ්බද දන්නෙත් නෑ. මම නම් දන්නේ නෑ. මන්ත්‍රීවරියකට ඉතිහාසයෙ කිසි දවසක මේ විදියට පහර දීලා නැහැ.
මාධ්‍ය:
එතකොට ඒ මන්ත්‍රීවරුන් දෙදෙනා ඔබතුමියට ආදරය කළාද
ඩයනා ගමගේ මහත්මිය:
මම නම් දන්නේ නෑ. විපක්ෂ නායක ඇතුළු සියලු දෙනා එහෙම හිතාගෙන හිටියද දන්නෙ නෑ.