දිය පිපාසයෙන් එන සතුන්ට වස දමා ඝාතනය කර මස් පිණිස විකිණීමේ ජාවාරමක් සෙල්ලකතරගම ප්‍රදේශයෙන් වාර්තා වී තිබේ.
සෙල්ලකතරගම ප්‍රදේශයට මායිම් ව ඇති යාල රක්ෂිත ප්‍රදේශයන් හී දඩයම්කරුවන් විසින් දිය කඩිති හා වැව් ආශ්‍රිතව වළවල් සාදා ඒවාට වස මිශ්‍ර කර මෙම ක්‍රියාව සිදුකර ඇති බව වනජීවී නිලධාරීන් අනාවරණය කරගෙන ඇත.
පසුව එම සතුන් දඩයම් කර, සතුන්ගේ මස් කතරගම ප්‍රදේශයන්ට පැමිණෙන පිරිස් වෙත හා විවිධ ප්‍රදේශයන් තුළ අලෙවි කරමින් මෙම ජාවරාම සිදුකරගෙන ගොස් ඇති බව සඳහන්ය.
විශේෂයෙන් කතරගම වන්දනාවේ පැමිණෙන වන්දනාකරුවන් ඉලක්ක කරගනිමින් ඔවුන්ට අවශ්‍ය මස් ලබා දීමට මෙම ක්‍රියාව සිදුකර තිබෙන බව වාර්තා වෙයි.
ඒ අයුරින් වස දමා මියගිය සතුන්ගේ මස් අලෙවි කිරීම තුළින් මිනිස් ජිවිත අවදානමක් ද පවතින බව වනජීවී නිලධාරීහු පෙන්වා දෙති.
මේ ආකාරයෙන් මියගිය සතුන්ගේ මළ සිරුරු ගණනාවක් මේ වනවිට සොයා ගැනීමට වනජීවී නිලධාරීන් සමත් වී ඇති නමුත් ඒ සම්බන්ධයෙන් සැකකරුවන් කිසිවකු සොයා ගැනීමට මෙතෙක් හැකි වී නැත.