ට්විටර් සම-නිර්මාතෘ සහ හිටපු ප්‍රධාන විධායක නිලධාරී ජැක් ඩෝර්සි ජනප්‍රිය යූ ටියුබ් වැඩසටහනකට ලබා දුන් සම්මුඛ සාකච්ඡාවක් ඉන්දියාව සහ ට්විටර් සමාජ ජාලය අතර බරපතල අර්බුදයක් නිර්මාණය කරමින් තිබෙනවා.
පසුගිය වකවානුවේ ට්විටර් මයික්‍රොබ්ලොගින් වේදිකාවේ මෙහෙයුම් වසා දමන බවට තර්ජනය කළ බව ඔහු කළ චෝදනාවක් ඉන්දීය ආණ්ඩුව ප්‍රතික්ෂේප කරන ලද අතර ඇමතිවරයෙකු එම ප්‍රකාශයන් “සම්පූර්ණ බොරුවක්” ලෙස හඳුන්වනු ලැබුවා.
යූ ටියුබ් වැඩසටහනක් සමඟ සම්මුඛ සාකච්ඡාවකදී ජැක් ඩෝර්සි පසුගිය සඳුදා ඉන්දීය රජය තමන් වෙත දැඩි පීඩනයක් එල්ල කළ බවට ඉන්දීය බලධාරීන්ට චෝදනා කළා.
පසුගිය වසරේ එලොන් මස්ක්ට ඩොලර් බිලියන 44කට විකුණා දැමූ ට්විටර් සමාජ ජාලයෙහි ඩෝර්සි තවදුරටත් සේවය නොකරන නමුත්, නව දිල්ලි පාලනය විසින්
ටිව්ටර් සමාගම සහ පොදුවේ සමාජ මාධ්‍යය සමඟ ඇති කරන බලපෑම පිළිබඳ අලුත් කතාබහක් කරලියට ගෙනැවිත් තිබෙනවා.
අගමැති නරේන්ද්‍ර මෝදිගේ පාලනය විසින් කෘෂිකාර්මික ලිබරල්කරණ සඳහා ගෙන ආ නීති තුනකට එරෙහිව නව දිල්ලි අගනුවර ආසන්නයේ දහස් ගණන් ගොවීන් 2021 වසරේදී කඳවුරු බැඳගත්තා.
එම විරෝධතා අතරතුර රජය එයට එරෙහිව කටයුතු කරන ආකාරය පිළිබඳව ප්‍රශ්න කරන ගිණුම් සම්බන්ධයෙන් දැඩිව කටයුතු කරන ලෙස ට්විටර් වෙත ඉන්දීය රජයේ “බොහෝ ඉල්ලීම්” වලට මුහුණ දීමට සිදු වූ බව ඩෝර්සි පවසා තිබුණා. කෙසේ වෙතත් අවසානයේ එම නීති අහෝසි කරනු ලැබුවා.
ට්විටර් වෙත එල්ල වූ පීඩනය පිළිබඳව හෙළි කරමින් ඩෝර්සි පැවසුවේ ‘ඉන්දියාවේ ට්විටර් වසා දමන’ බවටත් ‘අපි ඔබේ සේවකයින්ගේ නිවාස වටලනවා,’ යනුවෙනුත් ඉන්දීය රජයේ බලධාරීන් ප්‍රකාශ කළ බවයි.