බුදුන් වහන්සේට ප්‍රකාශනයට එහා ගිය විඥානයක් ඇති බවත් බදුන් වහන්සේගේ ඉගැන්වීම් වර්තමානයට මනාව ගැලපෙන බවත් ඉන්දීය අගමැති නරේන්ද්‍ර මෝදි මහතා පැවසීය.
ගෝලීය බෞද්ධ සමුළුවට විවිධ ප්‍රදේශවලින් විශාල පිරිසක් පැමිණ සිටීම මනුෂ්‍යත්වය එකම නූලකින් බැඳ තබන බුදුන් වහන්සේගේ ධර්මය නියෝජනය කරන බව ද කී අග්‍රාමාත්‍යවරයා නූතන යුගයේ ගැටලුවලට බුදුන් වහන්සේගේ පැරණි ඉගැන්වීම් හරහා විසඳුම් දෙන බව ද සඳහන් කළේය.
බුදු රජාණන් වහන්සේගේ ධර්මය ප්‍රචාරය කිරීම සඳහා ඉන්දියාව කැපවීමෙන් කටයුතු කර ඇති බව කී අග්‍රාමාත්‍යවරයා ඉන්දියාවේ සහ නේපාලයේ බෞද්ධ පරිසරය සංවර්ධනය කිරීම, සාරානාත් සහ කුෂිනගර් ප්‍රතිසංස්කරණය කිරීම, කුෂිනගර් ජාත්‍යන්තර ගුවන්තොටුපළ සහ ලුම්බිණියේ ඉන්දියානු ජාත්‍යන්තර බෞද්ධ උරුමයන් සහ සංස්කෘතික මධ්‍යස්ථාන ඇති කළ බව ද කීය.
නවදිල්ලි නුවරදී පැවැත්වෙන ගෝලීය බෞද්ධ සමුළුවේ සමාරම්භක දේශනය පවත්වමින් ඉන්දීය අග්‍රාමාත්‍ය නරේන්ද්‍ර මෝදි මහතා එසේ පැවසීය.
ඉන්දීය රජය ජාත්‍යන්තර බෞද්ධ සම්මේලනයේ සහයෝගීතාවයෙන් මෙම දෙදින වැඩමුළුව සංවිධානය කරයි.
මෙම සමුළුව බෞද්ධයන්ගේ අවශ්‍යතා පිළිබඳ ගෝලීය බෞද්ධ දහම් නායකත්වය සහ විද්වතුන් සම්බන්ධ කර ගැනීමටත්, ඒවා සාමූහිකව ආමන්ත්‍රණය කිරීමට ප්‍රතිපත්තිමය යෙදවුම් ඉදිරිපත් කිරීමටත් දරන ප්‍රයත්නයක් වන අතර මෙම සමුළුවට ශ්‍රී ලංකාවේ පූජ්‍ය පක්ෂය සහ නිලධාරීන් ඇතුළු ලොව පුරා කීර්තිමත් විද්වතුන්, බෞද්ධ නායකයින් සහ ධර්ම වෘත්තිකයන් සහභාගි වී සිටිති.