ආනයනය තහනම් කර ඇති ආහාර ද්‍රව්‍ය නීති විරෝධීව මෙරටට ආනයනය කිරීම නැවැත්වීමට නොහැකි නම් එම තහනම් ඉවත් කරන ලෙස රජයෙන් ඉල්ලීමක් කරන බවත් එසේ නොවුණ හොත් ජනතාවට තව දුරටත් වැඩි මිලට ආනයනික ආහාර ද්‍රව්‍ය මිලදී ගැනීමට සිදුවන බවත් අත්‍යවශ්‍ය ආහාර ආනයනකරුවග්ගේ සංගමයේ උපදේශක පැරකුම් අබේසේකර මහතා පැවසීය.
දේශිය නිෂ්පාදනය වැඩි කිරීමට යැයි පවසමින් 2019 වසරේ නොවැම්බර් මස ඉන්දියාවෙන් මුංඇට, කහ, උඳු සහ කව්පි ආදි ආහාර ද්‍රව්‍ය කීපයක් ආනයනය අත්හිටුවූ බව කී පැරකුම් අබේසේකර මහතා එය එසේ වුවද නීති විරෝධීව එම ආහාර ද්‍රව්‍ය ටොන් ගණනනින් රට තුළට පැමිණීමෙන් ජනතාව තව දුරටත් අපහසුතාවට පත්වන බව ද සඳහන් කළේය.
මෙරට වෙළෙඳපොල තුළ මේ වන විට ඇති මුංඇට, කහ, උඳු සහ කව්පි ආදි අහාර ද්‍රව්‍යවලින් වැඩි ප්‍රමාණයක් මෙරට නිෂ්පාදනය කළ ඒවා නොවන බවත් උත්සව සමයට අවශ්‍ය මුංඇට මිල අහස උසට ගොස් ඇති බවත් ඒ මහතා වැඩි දුරටත් සඳහන් කළේය.