පාකිස්තානයට තවදුරටත් ණය ලබාදීම සෞදි අරාබිය ප්‍රතික්ෂේප කරමින් සිටින බව විදෙස් මාධ්‍ය වාර්තා කරයි.
විදෙස් මාධ්‍ය වැඩිදුරටත් සඳහන් කරන්නේ ඒ වෙනුවෙන් සෞදි අරාබිය පාකිස්තානයෙන් ආර්ථික ප්‍රතිසංස්කරණ අපේක්ෂා කරන බවය.
පාකිස්තානය IMF ණය සහනය වෙනුවෙන් සෞදි අරාබිය ඇතුළුව ගල්ෆ් කලාපීය රටවල් 03 කින් සහාය අපේක්ෂා කරමින් සිටින පසුබිමක විදෙස් මාධ්‍ය මෙම පුවත වාර්තා කර තිබේ.
පවතින තත්ත්වය අනුව ඉදිරි වසර තුනහමාරක පමණ කාලයක් තුළ පාකිස්තානය ජාත්‍යන්තර ණයහිමියන් වෙත ඩොලර් බිලියන 80ක පමණ මුදලක් ආපසු ගෙවිය යුතුව ඇතැයි ද වාර්තා වෙයි.
එහෙත් මේ වනවිට පාකිස්තානය සතුව පවතින විදේශ විනිමය සංචිතය අමෙරිකානු ඩොලර් බිලියන 3ක් පමණක් බවද වාර්තා වෙයි.
එවන් පසුබිමක් තුළ පාකිස්තානයට තවදුරටත් ඇපයක් හෝ පොලී රහිත ණයක් ලබාදීම මෙලෙස ප්‍රතික්ෂේප කිරීමට සෞදි අරාබිය තීරණය කර ඇතැයි වාර්තා වෙයි.