විදුලිබල පනත හා මහජන උපයෝගිතා කොමිසමේ පනත අනුව ලංකා විදුලිබල මණ්ඩලයට, විදුලිබල හා බලශක්ති අමාත්‍යාංශයට හෝ කැබිනට් මණ්ඩලයට විදුලි ගාස්තු වැඩිකිරීමට කිසිඳු බලයක් නැතැයි 43 වන සේනාංකයේ නායක, පාර්ලිමේන්තු මන්ත්‍රී පාඨලී චම්පික රණවක මහතා පැවසීය.
එමෙන්ම අතීතයට බලපාන අයුරින් විදුලිබල වැඩි කළ නොහැකි බවත්, මෙහි සම්පූර්ණ බලය ඇත්තේ මහජන උපයෝගිතා කොමිසමට බවත් කී මන්ත්‍රීවරයා ජනවාරි 1 වැනිදා සිට ක්‍රියාත්මක වන පරිදි විදුලිබිල වැඩිකිරීම ව්‍යවස්ථාවට හා නීතියට පටහැනි බව ද සඳහන් කළේය.
පාඨලී චම්පික රණවක මහතා මේ බව පැවසුවේ 43 වන සේනාංක මූලස්ථානයේ දී ඊයේ (10) පැවති මාධ්‍ය හමුවක් අමතමිනි.
ජනතාවගේ පිට මත විශාල බදු බරක් පටවා ඇති මේ මොහොතක විදුලිබිලත් පැටෙව්වොත් ඔවුන්ගේ කොන්ද කැඩී යා හැකි බවත්, ඒ නිසා කොන්ද කෙලින් තියාගෙන මෙයට එරෙහිව නැගී සිටින්නැයි තමන් ජනතාවගෙන් ඉල්ලා සිටින බවත් පාඨලී චම්පික මහතා පැවසීය. ගෝඨාභය රාජපක්‍ෂ මහතාගේ ආණ්ඩුව මෙන්ම චන්ද්‍රිකා බණ්ඩාරනායක මහත්මියගේ ආණ්ඩුව ද බිඳවැටුණේ විදුලි අර්බුදයක් නිසා බව කී එවැනි තත්වයක් ඇතිකර නොගැනීමට ආණ්ඩුව කටයුතු කළ යුතු බව ද පැවසීය.