සංඝ කථිකාවත් තුළින් භික්ෂුන් වහන්සේ පාලනය කිරීමට රජය උත්සාහ ගන්නා බවට වැරදි මතයක් සමාජගත වී ඇතැයි කෝට්ටේ ශ්‍රී කල්‍යාණි සාමාග්‍රී ධර්ම මහා සංඝ සභාවේ අනුනායක මහාචාර්ය පූජ්‍ය කොටපිටියේ රාහුල හිමියෝ පවසති.
උන්වහන්සේ ඒ බව සඳහන් කළේ, වාද්දූව විවේකාරාම විහාරස්ථානයේ පසුගිය 31 වනදා පැවති ආගමික උත්සවයකදීය.
එහිදී අදහස් දැක්වූ කෝට්ටේ ශ්‍රී කල්‍යාණි සාමාග්‍රී ධර්ම මහා සංඝ සභාවේ අනුනායක මහාචාර්ය පූජ්‍ය කොටපිටියේ රාහුල හිමියන්,
“මේ සංඝ කථිකාවත් පිළිබඳව සමාජයේ වැරදි මතයක් ගොඩනැගිලා තියෙනවා. භික්ෂූන් පාලනයට රජය තැත් කරන බවට මතයක් තියෙනවා. ඒක වැරදි මතයක් අපි දිගු කළක් සාකච්ඡා කළ කරුණක් මේක. මේ සමාජයේ වැඩ ඉන්න ඇතැම් දඩබ්බර භික්ෂූන් පාලනයට අපි පියවර ගැනීමක්. භික්ෂු ව්‍යවස්ථාව තමයි ප්‍රාතිමෝක්ෂයයි කියන්නේ. මූලික ව්‍යවස්ථාව අපි කවුරුවත් වෙනස් කරන්නේ නැහැ. හිතන්න එපා මේ නිකාය, පාර්ශව තිබුණා කියලා. හිතුමතේට අපිව වෙනස් කරන්න. අපි වෙනස් කරන්න දෙන්නෙත් නැහැ. ඒ නිසා කථිකාවත් හදන්නේ සංඝ සභා මගින් පාර්ලිමේන්තුවේ නීතිගත කරලා බලයක් දෙනවා. බොහෝ දෙනෙක් වැරදි මතවල ඒ නොදන්නාකම. මුළු සමාජයේම තියෙන මේ නරක ප්‍රතිපත්ති අපි ඉවත් කරන්න ඕනේ.”