එක්දින ලකුණු දහසේ සීමාවට වේගයෙන්ම ලඟාවූ ලකුණු සබඳතාවේ වාර්තාව සමකිරීමට ඔස්ට්‍රේලියාවේ ඩේවිඩ් වෝනර් හා ට්‍රැවිස් හීඩ් සමත්විය.
ඒ එංගලන්තය සමගින් පැවති තෙවැනි හා අවසන් එක්දින තරගයේදීය. මෙහිදී වෝනර් හා හීඩ් පළමු කඩුල්ලට ලකුනු 269 ක දැවැන්ත සබඳතාවක් පැවැත්වූහ.
ඒ සමගින් ඔවුන් දෙදෙනා එක්දින ලකුණු දහසේ සබඳතාවට පැමිණියේ ඉනිම් 13 ක් පමණක් වැය කරමිනි.
මීට පෙර ඉනිම් 13 කදී ලකුනු දහසේ සබඳතාවට පැමිණ තිබුනේ නවසීලන්තයේ රොජර් තෝස් හා නේදන් ඇස්ලේ යන යුගලය පමණි.
ඊට අමතරව අඩුම ඉනිම් ගණනකින් මෙම සීමාවට පැමිණි අනෙකුත් පිතිකරුවන් ලෙස එංගලන්තයේ ජේසන් රෝයි හා ජෝ රූට් (ඉනිම් 14), ඉන්දියාවේ එම්.එස්. දෝනි හා ගෞතම් ගම්භීර් (ඉනිම් 14) මෙන්ම රෝහිත් ෂර්මා හා ලෝකේෂ් රාහුල් (ඉනිම් 14) ඉදිරියෙන් පසුවූහ.
මෙය වෝනර් – හීඩ් යුවලගේ එක්දින පිටියේදී ලකුනු 250 සීමාව ඉක්මවූ දෙවැනි සබඳතාව විය. මීට පෙර 2017 වර්ෂයේදී ඇඩිලේඩ් හිදී පකිස්ථානයට එරෙහිව ඔවුන් දෙදෙනා ලකුනු 284 ක සබඳතාවක් පවත්වා ඇත. එක්දින පිටියේ මොවුන් දෙදෙනාට පෙර එම දස්කම දක්වා ඇත්තේ ඉන්දීය කණ්ඩායමේ සචින් තෙන්ඩුල්කාර් හා සෞරව් ගංගුලි යන යුගලය පමණි. ඔවුන් දෙදෙනා 1998 වර්ෂයේ කොළඹදී ශ්‍රී ලංකාවට එරෙහිවද (252), 2001 වර්ෂයේදී පාල් හිදී කෙන්යාවට එරෙහිවද (258) මෙවැනි දස්කමක් දක්වා ඇත.