ඇෆ්ගනිස්තාන ක්‍රිකට් කණ්ඩායම ශ්‍රී ලංකාවේ එක් දින ක්‍රිකට් තරගාවලියකට සහභාගී වීම සදහා අද (22දා) උදෑසන කටුනායක ගුවන් තොටුපළ වෙත පැමිණියේය.
ක්‍රීඩකයන් සහ නිලධාරීන් 28 දෙනෙකුගෙන් සමන්විත ඇෆ්ගනිස්තාන ක්‍රිකට් පිළ කණ්ඩායම් දෙකක් වශයෙන් කටුනායක ගුවන් තොටුපළ වෙත පැමිණීමට නියමිතය.
මෙයින් පළමු කණ්ඩායම වශයෙන් 14 දෙනෙකු 11/22 උදෑසන 08.30 ට ඩුබායි සිට එමිරේට්ස් ගුවන් සේවයේ ඊ.කේ.- 650 දරන ගුවන් යානයෙන් කටුනායක ගුවන් තොටුපළ වෙත පැමිණ තිබුණි .
අනෙක් 14 දෙනෙකුගෙන් යුතු ඇෆ්ගනිස්තාන ක්‍රිකට් කණ්ඩායම 11/22 දින උදෑසන 10.40 ට ඩුබායි සිට ෆ්ලයි ඩුබායි ගුවන් සේවයේ එෆ්.ඉසෙඩ්.- 1025 දරන ගුවන් යානයෙන් කටුනායක ගුවන් තොටුපළ වෙත පැමිණ තිබුණි.
මෙම ඇෆ්ගනිස්තාන ක්‍රිකට් කණ්ඩායම මහනුවර පල්ලෙකැලේ ක්‍රීඩාංගණයේදී එළඹෙන 25 , 27 සහ 30 යන දින වල පවත්වනු ලබන එක් දින සීමිත ඕවර 50 තරග 03 කට සහභාගී වීමට නියමිතය.
එහෙයින් මෙම ඇෆ්ගනිස්තාන ක්‍රිකට් කණ්ඩායම කටුනායක ගුවන් තොටුපළ වෙත පැමිණීමෙන් පසුව , එතැන් සිට කෙලින්ම මහනුවර බලා පිටත්ව යන බව ශ්‍රී ලංකා ක්‍රිකට් ආයතනයේ ප්‍රකාශකවරයෙකු පැවසීය.
මෙම පිරිස පිළිගැනීම සදහා ශ්‍රී ලංකා ක්‍රිකට් ආයතනයේ නිලධාරීන් පිරිසක් කටුනායක ගුවන් තොටුපළ වෙත පැමිණ සිටි අතර ගුවන් තොටුපළ සිට දැඩි ආරක්ෂක විධිවිධාන යටතේ ඔවුන් කැදවා ගෙන යනු ලැබීය.