මාලි බෝම්බ ප්‍රහාරය ගැන එක්සත් ජාතීන් පරීක්ෂණයක් ඉල්ලයි

0
18

ශ්‍රී ලංකා යුද හමුදාවේ නිලධාරීන් දෙදෙනකුට මරු කැඳවමින් මාලිහිදී එක්සත් ජාතීන්ගේ සාම සාධක හමුදා භටයන් ඉලක්ක කරමින් සාම සාධක හමුදා සම්බන්ධයෙන් විමර්ශන සිදු කර අපරාධකරුවන්ට එරෙහිව නීතිය ක්‍රියාත්මක කරන්නැයි එක්සත් ජාතීන්ගේ සංවිධානය මාලි රාජ්‍යයට අවධාරණය කරයි.

සාම සාධක හමුදා ඉලක්ක කරගනිමින් එල්ල වූ එම ප්‍රහාරයෙන් එක්සත් ජාතීන්ගේ සාම සාධක කටයුතුවල නිරත වෙමින් සිටි ශ්‍රී ලංකා යුද හමුදාවේ කපිතාන්වරයකු සහ කෝප්‍රල්වරයකු මියගොස් තවත් හයදෙනෙක් තුවාල ලැබූහ.

අධිබලැති පුපුරණ ද්‍රව්‍ය යොදා ගනිමින් හමුදා සෙබළුන් ගමන් කරමින් සිටි රථ පෙළකට එල්ල වූ එම ප්‍රහාරය හෙළා දකිමින් එක්සත් ජාතීන්ගේ මහලේකම් ඇන්තෝනියෝ ගුටරෙස් මහතා නිවේදනයක් ද නිකුත් කළේය.

“එක්සත් ජාතීන්ගේ සාම සාධක හමුදා ඉලක්ක කරගනිමින් එල්ල වූ ප්‍රහාරය ජාත්‍යන්තර නීතිය අනුව යුද අපරාධයක්” යැයි එක්සත් ජාතීන්ගේ මහලේකම්වරයා වෙනුවෙන් නිව්යෝක් නුවර ඔහුගේ කාර්යාලය නිකුත් කළ නිවේදනයේ දැක්විණි.

ත්‍රස්ත ක්‍රියා මර්දනය කිරීම සඳහා එක්සත් ජාතීන්ගේ හමුදා සහ පොලිස් නිලධාරීන් 14,000කට වැඩි පිරිසක් 2013 වසරේ සිට මාලි රාජ්‍යයේ ස්ථාපිත කර සිටිති.

එක්සත් ජාතීන්ගේ සාම සාධක හමුදා වෙත ප්‍රහාර එල්ල කරන ලද ප්‍රහාරය සම්බන්ධයෙන් කඩිනම් විමර්ශනයක් සිදු කර අපරාධකරුවන් අධිකරණයට ගෙන එන්නැයි එක්සත් ජාතීන්ගේ ආරක්ෂක කවුන්සිලය නිවේදනයක් නිකුත් කරමින් මාලි රාජ්‍යයට අවධාරණය කළේය.