කඩු පොලු රැගෙන හයක් මහ රෑ ඇවිත් තරුණිය පැහැරගෙන යති

0
339

අම්බලන්තොට, වලවවත්ත නිවසකට 02වනදා රාත්‍රි කඩාවැදුණු හය දෙනකුගෙන් යුත් පිරිසක් නිවසට වෙඩි තබා නිවැසියන් බියකර නිවසේ සිටි 17 හැවිරිදි තරුණියක බලහත්කාරයෙන් පැහැරගෙන ගිය බව ඇගේ මවුපියන් අම්බලන්තොට පොලිසියට පැමිණිලි කර ඇත.

අලුයම 2.30ට පමණ නිවසට ඇතුළු වූ මේ පිරිස අත ගිනි අවි හා කැපෙන ආයුධ තිබූ බව ද පැමිණිල්ලේ සඳහන් වී ඇති බව පොලිසිය කියයි. නිවසට ඇතුළු වූ පිරිස ගෙහිමියාට ගිනි අවිය පෙන්වා බිය කර වැඩි මහල් දියණියගේත් ගෙලට තියුණු ආයුධයක් තබා බිය කර 17 හැවිරිදි තරුණිය සිටි කාමරයට ගොස් ඇය පැහැරගෙන ගිය බව පැමිණිල්ලේ සඳහන් වේ.

සිද්ධිය පිළිබඳව පරීක්‍ෂණ පවත්වන අම්බලන්තොට පොලිස් ස්ථානයේ විවිධ පැමිණිලි අංශයේ ස්ථානාධිපති පොලිස් පරීක්‍ෂක ඩී. එදිරිසිංහ මහතා පැවසුවේ මත් කුඩුවලට ඇබ්බැහි වී සිටි පුද්ගලයකුගේ ප්‍රේම සම්බන්ධයක් හේතුවෙන් මෙම පැහැර ගැනීම සිදුවී ඇති බව මූලික පරීක්‍ෂණවලින් හෙළි වී ඇති බවය. සැකකරු අත්අඩංගුවට ගැනීමට පරීක්‍ෂණ පවත්වන බවද පොලිසිය කියයි.