අගමැති නියෝගයෙන් පොලිස්පතිගේ ස්කොට්ලන්යාඩ් සංචාරය නවතී

0
213

පොලිසිය ප‍්‍රතිසංස්කරණය කළ යුතු ආකාරය සහ ප‍්‍රජා පොලිස් සංකල්පය වැඩිදියුණු කිරීම සම්බන්ධයෙන් ස්කොට්ලන්යාඩ් පොලිසියේ පැවැත්වෙන විශේෂ වැඩමුළුවකට බි‍්‍රතාන්‍ය බලා යාමට සිටි පොලිස්පතිවරයා ඇතුලූ නියෝජිතයින් පස් දෙනාගේ ගමන අගමැති රනිල් වික‍්‍රමසිංහ මහතාගේ නියමයෙන් රාජ්‍ය පරිපාලන , නීතිය හා සාමය පිළිබඳ අමාත්‍ය රංජිත් මද්දුම බණ්ඩාර මහතා විසින් අත්හිටුවා ඇති බව එම අමාත්‍යාංශය කියයි.

මෙම ගමන සදහා රාජ්‍ය පරිපාලන, නීතිය හා සාමය පිළිබඳ නියෝජ්‍ය අමාත්‍ය නලීන් බණ්ඩාර, අමාත්‍යාංශ ලේකම් පද්මසිරි ජයමාන්න, ජ්‍යෙෂ්ඨ සහකාර ලේකම් මාලිකා සුරියපෙරුම , පොලිස්පති පුජත් ජයසුන්දර, ජ්‍යෙෂ්ඨ පොලිස් අධිකාරි මහේෂ් සේනාරත්න යන මහත්ම මහත්මීන් සහභාගි වීමට නියමිතව තිබුණි.

මෙම වැඩමුළුව අද (1) දින සිට (7) වැනි දින දක්වා ස්කොට්ලන්යාඩි බ්‍රිතාන්‍යයේදී පැවැත්වීමට නියමිතව තිබුණි.

මහනුවර ති‍්‍රත්ව විද්‍යාලයෙන් රුපියල් ලක්ෂ 120 ක මුදලක් ලබාගත් බවට එල්ලවන චෝදනා සම්බන්ධයෙන් පොලිස්පතිවරයාට එරෙහිව අමාත්‍යාංශයේ ති‍්‍රපුද්ගල කමිටුවක් හරහා සිදුකරන පරීකෂණය සහ පොලිස්පතිවරයා සහ පොලිසිය සම්බන්ධයෙන් මේ දිනවල සමාජයේ ඇති මතවාද සැලකිල්ලට ගෙන අගමැතිවරයා මෙම ගමන අත්හිටුවීමට පියවර ගෙන ඇති බවද අමාත්‍යාංශයේ උසස් නිලධාරියෙක් සඳහන් කළේය.

සිද්ධිය සම්බන්ධයෙන් රාජ්‍ය පරිපාලන , නීතිය හා සාමය පිළිබඳ නියෝජ්‍ය අමාත්‍ය නලීන් බණ්ඩාර මහතාගෙන් ලංකාදීපය කළ විමසුමකදී ඒ මහතා පැවසුවේ මෙම ගමන අත්හිටුවීම කථාව සත්‍ය බවයි.

තමාද, පොලිස්පතිවරයාද, නීතිය හා සාමය පිළිබද අමාත්‍යංශයේ ලේකම් පත්මසිරි ජයමාන්න මහතා ද ප‍්‍රමුඛ නියෝජිතයින් පස්දෙනෙක් මෙම ගමන යාමට නියමිතව සිටි බවද නියෝජ්‍ය ඇමැතිවරයා වැඩිදුරටත් පැවසීය.

එසේ යාමට නියමිතව සිටියදී පොලිස්පතිවරයා ට එල්ල වී ඇති චෝදනා සම්බන්ධයෙන් විමර්ශනය පැවැත්වීම ඇතුලූ කරුණු කිහිපයක් හේතුවෙන් මෙම වැඩමුළුවට යාම මෙය අවස්ථාවක් නොවන බවට අගමැතිවරයා දැනුම් දුන් බවද අමාත්‍යවරයා වැඩිදුරටත් පැවසීය.